Коррупцияга қарши курашиш масалаларига бағишланган тадбирда иштирок этилди

“Ўзсаноатқурилишбанк” АТБда “9 декабрь – Халқаро коррупцияга қарши курашиш куни” муносабати билан очиқ эшиклар куни ташкил этилди.

Тадбирда “Ўзсаноатқурилишбанк” АТБ, бошқа давлат ва тижорат банклари, тадбиркорлик субъектлари ва оммавий ахборот воситалари вакиллари қатнашди.

Шунингдек, тадбирда Коррупцияга қарши курашиш агентлиги, Ҳуқуқни муҳофаза қилиш академияси, Адлия вазирлиги ва Дин ишлари бўйича қўмитанинг масъул ходимлари маърузалар билан иштирок этишди.

Хусусан, Академиянинг Коррупцияга қарши курашиш илмий-таълим маркази бошлиғи Х.Турсунбеков ўз чиқишида миллий қонунчиликда коррупциявий ҳуқуқбузарликлар, улар учун назарда тутилган жавобгарлик чоралари, мамлакатимизда коррупциявий жиноятлар учун жавобгарлик муқаррарлиги тамойилини халқаро стандартлар асосида такомиллаштириш бўйича олиб борилаётган ислоҳотлар ҳақида маълумот берди.

Тадбир якунида Академияга “Ўзсаноатқурилишбанк” АТБда коррупциянинг олдини олишда қўшаётган ҳиссаси учун ташаккурнома топширилди.