Фарғона ва Наманган вилоятларида суд ҳамда ҳуқуқни муҳофаза қилувчи органлар ходимларининг учрашуви

Ҳуқуқни муҳофаза қилиш академияси томонидан Ўзбекистон Республикаси Судьялар олий кенгаши, Ўзбекистон Республикаси Олий суди, Судьялар олий мактаби ҳамда Ички ишлар вазирлиги билан ҳамкорликда Фарғона ва Наманган вилоятларида прокуратура, ички ишлар органларининг ходимлари ҳамда жиноят ишлари бўйича судьялар иштирокида суд-тергов фаолиятида юзага келаётган масалалар доирасида манзилли семинар ўтказилди.

Семинарда жиноят ишлари бўйича суриштирув ва тергов ҳаракатларини ўтказиш ҳамда далиллар мақбуллигини таъминлашда қонунийликка риоя этиш масалалари амалий мисоллар асосида муҳокама этилди.

Шунингдек, ЖПКнинг 416-417-моддадалари тартибида жиноят ишларини қўшимча терговга қайтаришга сабаб бўлаётган омиллар, муайян тоифадаги жиноятларни квалификация қилишда йўл қўйилаётган камчиликлар, шартли ҳукм қилинган вояга етмаганларга нисбатан жамоат тарбиячиларини тайинлаш, жиноятларни квалификация қилиш ва ҳукм чиқаришда қонуннинг орқага қайтиш кучи ва шу каби бошқа бир қатор масалалар муҳокама этилди.

Семинар иштирокчилари суд-тергов фаолиятида қонунларни қўллашда ягона ёндашувни таъминлаш мақсадида ҳамкорликни мунтазам амалга оширишнинг аҳамияти ҳақида тўхталиб, амалиётда юзага келиши мумкин бўлган  муаммоларни биргаликда ҳал этилишига имкон берувчи мулоқот майдончасини яратишни таклиф этдилар.