Криптоактивларга оид тергов ҳаракатларини олиб бориш бўйича семинар-тренинг ўтказилди

Ўзбекистон Республикаси Ҳуқуқни муҳофаза қилиш академиясида прокуратура терговчилари, Иқтисодий жиноятларга қарши курашиш департаменти ходимлари ва Академия ўқитувчилари учун хорижий экспертлар томонидан "Криптоактивларга оид тергов ҳаракатларини олиб бориш" мавзусида ихтисослаштирилган семинар-тренинг ташкил этилди.

Семинарнинг мақсади Ўзбекистон Республикаси ҳуқуқни муҳофаза қилувчи органлар терговчи ва ходимларининг криптоактивлар билан боғлиқ жиноятларни тергов қилишда салоҳиятини оширишдан иборат.

Тўрт кунлик семинар-тренинг дастури криптовалюталарнинг асослари, очиқ маълумотларга асосланган разведка (ОМАР)нинг сараланган воситалари; транзакцияни крипто-биржагача кузатиш; криптовалюталарни текшириш воситалари; даркнет янгиликлари; TAILSда ҳамён очиш, унинг турлари, кириш ва ишлатиш йўллари; марказлаштирилмаган молия (ММ), марказлаштирилмаган биржа (МБ) ва бошқа долзарб масалаларини ўз ичига олди.

Шунингдек, Лос-Анджелес полиция детективи (АҚШ) онлайн шаклда "Seed" орқали крипто ҳамённи тиклаш жараёнини кўрсатиб берди.

Семинар-тренинг якунида катнашчилар тегишли сертификатлар билан тақдирланишди.