БМТ Коррупцияга қарши конвенциясининг конференцияси модели ташкил этилди

Халқаро коррупцияга қарши курашиш куни муносабати билан Академия томонидан Коррупцияга қарши курашиш агентлиги, БМТнинг Гиёҳвандлик ва жиноятчилик бўйича бошқармаси ва “Минтақавий мулоқот” ХННТ билан ҳамкорликда анъанавий тарзда БМТнинг Коррупцияга қарши конвенцияси иштирокчи-давлатлари конференцияси модели: “Конвенцияни амалга ошириш механизми: иккинчи босқич обзори” тадбири ташкил этилди.

Тадбирда Бердақ номидаги Қорақалпоқ давлат университети, Тошкент шаҳридаги Халқаро Вестминстер университети, Жаҳон иқтисодиёти ва дипломатия университети, Самарқанд давлат университети, Тошкент давлат юридик университети, Судьялар олий кенгаши ҳузуридаги Судьялар олий мактаби, Тошкент давлат юридик университети ва Ҳуқуқни муҳофаза қилиш академиясининг магистратура тингловчилари ролли ўйинлар шаклида Конвенция иштирокчи-давлатлари делегатлари сифатида икки босқичдан иборат бўлган тадбирларда ўзаро билимларини синашди.

Биринчи босқич давомида иштирокчилар Малайзия, Япония, Испания, Латвия, Буюк Британия, Канада ва Ўзбекистон давлатларининг шартли делегатлари сифатида Конвенциянинг 13-моддасига асосан фуқаролик жамиятининг коррупцияга қарши курашдаги фаол иштироки юзасидан чиқиш қилишди.

Хусусан, делегатлар ўз чиқишларида аҳолини қарорларни қабул қилиш жараёнларига жалб қилиниши, давлатда аҳоли учун ахборотнинг очиқлиги таъминланиши, аҳоли ўртасида коррупцияга муросасиз муҳитни яратишга қаратилган тадбирларнинг ўтказилиши, шунингдек коррупцияга қарши таълим дастурлари, шу жумладан мактаб ва олийгоҳларда ўқув дастурларининг амалга оширилиши каби масалаларга алоҳида урғу қаратишди ҳамда бошқа делегацияларнинг саволларига жавоб бериш орқали дебатларда қатнашишди.

Тадбирнинг иккинчи қисмида иштирокчилар олинган янги билимлар асосида Ўзбекистонда коррупцияга қарши курашишда фуқаролик жамиятининг фаоллигини янада кучайтириш, очиқлик ва шаффофликни оширишга қаратилган таклифлар юзасидан тақдимот ўтказишди.

Делегацияларнинг чиқишлари Коррупцияга қарши курашиш агентлиги, БМТ ГЖБ ва “Минтақавий мулоқот” ХННТдан жалб қилинган экспертлар томонидан баҳолаб борилди.

Ташкил этилган тадбир таълим муассасалари тингловчиларининг БМТ Коррупцияга қарши конвенцияси қоидалари бўйича билимларини оширишга, Конвенция бўйича обзор механизмларини ўтказишга ҳамда хорижий мамлакатлар ва Ўзбекистонда фуқаролик жамиятининг коррупцияга қарши курашишдаги тажрибалари билан яқиндан танишишга имконият берди.