Халқаро коррупцияга қарши курашиш куни муносабати билан ўтказилган тадбирда иштирок этилди

Академия вакиллари Халқаро коррупцияга қарши курашиш куни муносабати билан Ўзбекистон Республикаси Марказий банки томонидан ўтказилган “Ўзбекистон Республикаси Марказий банки ва тижорат банкларида коррупцияга қарши ички назорат тизимини жорий этиш ҳамда самарали бошқариш омиллари” мавзусидаги семинарда иштирок этишди.

Тадбирда Марказий банк ҳамда барча тижорат банклари раҳбарияти ва коррупцияга қарши курашишга масъул бўлган тармоқ раҳбарлари қатнашди.

Семинарда Марказий банк, Ҳисоб палатаси раҳбарияти, CERT халқаро академияси, Ҳуқуқни муҳофаза қилиш академияси ва “Ўзсаноатқурилишбанк” АТБнинг масъул ходимлари маърузалар билан иштирок этишди.

Хусусан, Академиянинг Коррупцияга қарши курашиш илмий-таълим маркази бошлиғи Х.Турсунбеков иштирокчиларга мамлакатда коррупция учун жавобгарлик муқаррарлигини таъминлаш амалиёти ва бу борада олиб борилаётган ислоҳотлар ҳақида маълумот берди.