Туркий ҳуқуқ тарихига бағишланган халқаро симпозиумда иштирок этилди

Академия вакиллари Туркия Республикасининг Анқара шаҳрида турк ҳуқуқи тарихига бағишланган симпозиумда иштирок эттилар.

Симпозиум доирасида Озарбайжон, Қозоғистон, Қирғизистон, Ўзбекистон, Туркия республикаларининг таниқли олимлари, тарихчилар, сиёсатшунослар, ҳуқуқшунос ўқитувчилари ҳамда давлат ташкилоти ваикллари иштирок этди.

Туркий давлат ташкилоти (ТДТ) Котибиятининг Туркия Адлия академияси томонидан ташкил этилган ушбу тадбирдан кўзланган асосий мақсад туркий давлатлар ва халқлари ўртасида умумий ҳуқуқий маконни ривожлантириш, самарали халқаро ҳамкорликни йўлга қўйиш мақсадида мулоқот майдонини кенгайтириш,  тажриба алмашиш ҳамда туркий давлатларнинг ўзаро яқинлашувини янги босқичга олиб чиқишдан иборат. 

Симпозиум турк ҳуқуқи тарихини, унинг тарихий, маданий, маънавий меросларини чуқур ўрганиш, таҳлил этиш, ўзаро алоқаларни мустаҳкамлаш ва келажакда уни янада бойитишга замин яратди. Шунингдек, тадбирда миллий ҳуқуқий тизимнинг турк ҳуқуқи тарихида ва халқаро ҳуқуқ доирасида тутган ўрни, миллий давлатчиликни ривожлантиришда ҳуқуқшунос олимлар, давлат арбобларининг роли, турк ҳуқуқ тарихининг воқеаликлари тарихий ва замонавий мисоллар орқали таҳлил этилди. 

Ўзбекистон Республикаси Ҳуқуқни муҳофаза қилиш академияси вакиллари Ш.И.Шайзаков симпозиумнинг “Туркий-ҳуқуқий тарихни шакллантирувчи давлат арбоби” йўналишида “Хоразмшоҳлар сулоласининг туркий давлат сиёсий ҳуқуқий муносабатлар тизими тараққиётида тутган ўрни” мавзусида ҳамда М.М.Мамасиддиқов “Туркий-ҳуқуқий тарихни шакллантирувчи ҳуқуқшунос олим” йўналишида “Моварауннаҳрда турк ҳуқуқ тарихини ривожлантирган олимлар: Бурҳониддин Марғиноний мисолида” мавзусида маърузалар билан иштирок этди.

Тадбир якунида Ўзбекистон Республикаси Ҳуқуқни муҳофаза қилиш академияси аъзо бўлган Туркий суд-ҳуқуқ таълими тармоғи иштирокчилари ўртасида ҳамкорликни янада мустаҳкамлаш, юридик кадрларни тайёрлаш, ўзаро тадқиқотлар ўтказиш соҳасида келишувларга эришилди.