Туркия Президенти ҳузуридаги Халқ кутубхонасининг фаолияти билан яқиндан танишув

Турк ҳуқуқи тарихига бағишланган халқаро симпозиум доирасида Ўзбекистон Республикаси Ҳуқуқни муҳофаза қилиш академияси вакиллари Туркия Президенти ҳузуридаги Халқ кутубхонасининг фаолияти билан яқиндан танишдилар.

Анқара шаҳрида 2020 йил 22 февраль куни тантанали равишда очилган Халқ кутубхонаси 125 минг кв. метр майдонга эга бўлиб, 5 минг китобхонга хизмат кўрсата олади.

Кутубхона фондида 4 млн. донадан ортиқ китоб ва босма материаллар, Усмонлилар архивидан 45 млн. ҳужжат, Туркия қўлёзмалар уюшмасидан 300 минг қўлёзма, Миллий академик тармоқ ва ахборот марказидан 550 минг электрон китоб, Президентликка тегишли 46 та маълумотлар базаси, 6.5 млн. электрон тезис, 120 млн. мақола, 60 минг электрон ҳужжат мавжуд.

Кутубхонанинг Дунё китоблари бўлимига Ўзбекистонда топилган ҳамда чоп этилган нодир китоблар ҳам жойлаштирилган.

Ўзбекистон Республикаси делегация вакиллари кутубхона фонди билан яқиндан танишиб, кутубхона учун ўз туҳфаларини тақдим этди.