Коррупцияга қарши курашиш бўйича юксак мукофотнинг топшириш маросими ва Ҳалоллик чемпионлари форумида иштирок этилди

Ўзбекистон Республикаси Ҳуқуқни муҳофаза қилиш академияси вакиллари жорий йилнинг 19-20 декабрь кунлари Тошкент шаҳридаги Конгресс марказида бўлиб ўтган Қатар Амири Шайх Тамим бин Ҳамад Ол Соний томонидан (Қатар Ҳукумати ва БМТ шафеълигида) таъсис этилган Коррупцияга қарши курашиш бўйича юксак халқаро мукофот билан тақдирлаш маросими, шунингдек Ҳалоллик чемпионлари форумида иштирок этишди.

Коррупцияга қарши курашиш бўйича юксак халқаро мукофот билан тақдирлаш маросимида Ўзбекистон Республикаси Президенти Шавкат Мирзиёев, мукофот асосчиси – Қатар Амири шайх Тамим бин Ҳамад Ол Соний ҳамда Бирлашган Миллатлар Ташкилоти вакиллари, 40 дан зиёд мамлакат делегациялари, шу жумладан ушбу халқаро мукофот совриндорлари қатнашди.

Тадбир доирасида “Tashkent city” халқаро ишбилармонлик маркази ҳудудида Ўзбекистон Республикаси Президенти Шавкат Мирзиёев ва Қатар Амири Шайх Тамим бин Ҳамад Ол Соний томонидан Халқаро мукофотнинг рамзий монументнинг очилиш маросими бўлиб ўтди.

Ўзбекистон Президенти форум иштирокчиларини қутлар экан, шиддат билан ўзгараётган дунёдаги энг долзарб муаммолардан бири бўлган коррупцияга қарши курашиш соҳасида глобал мукофотнинг таъсис этилгани ва уни топширишга бағишланган маросимлар барча қитъаларда ўтказиб келинаётгани юксак эътирофга сазовор эканлигини таъкидлади. – Зеро, коррупцияга қарши курашиш ҳар бир соф виждонли инсоннинг, демократик жамият ва давлатнинг муқаддас бурчидир, - деди Шавкат Мирзиёев.

Ўзбекистонда коррупцияга қарши курашиш борасидаги тизимли ҳуқуқий ва институционал ислоҳотлар, БМТ, ИҲХТ ва бошқа нуфузли халқаро ташкилотлар билан яқиндан амалга оширилаётган ҳамкорлик масалалари таъкидланди. Ҳукумат фаолиятининг очиқ ва ошкоралигини таъминлаш ва масъулиятини ошириш, бюрократияни камайтириш ва давлат хизматларини соддалаштириш, коррупциянинг олдини олишга қаратилган превентив механизмлар амалиётга кенг жорий этиш тадбирлари айтиб ўтилди.

Давлатимиз раҳбари коррупцияга қарши курашиш соҳасида бир қатор таклиф ва ташаббусларни илгари сурди. 2030 йилга қадар Коррупцияга қарши курашиш миллий стратегиясини ишлаб чиқиш ва амалга ошириш, ННТларни фаол жалб этган ҳолда, ўзаро тажриба алмашиш ва мулоқотларни кучайтириш, илмий изланишлар олиб бориш мақсадида Коррупция муаммолари бўйича минтақавий тадқиқот марказини ташкил этиш, Коррупцияга қарши курашиш агентлигининг салоҳиятини янада ошириш, коррупция ҳолатлари бўйича “дастлабки ўрганиш” – коррупцион суриштирув институти жорий этиш каби янги механизмларни татбиқ қилиш шулар жумласидандир.

Болаликдан “ҳалоллик вакцинаси” билан эмланган янги авлодни камолга етказиш устувор вазифа сифатида қайд этилди. БМТнинг Коррупцияга қарши таълим ва ёшларнинг имкониятларини кенгайтириш глобал ресурси дастурини Ўзбекистонда кенг жорий этиш режалаштирилган.

Ўзбекистон Президенти коррупцияга қарши курашиш бўйича журналистлар имкониятларидан унумли фойдаланиш ва улар таъсирини янада ошириш учун Глобал медиа форумни ўтказиш таклифини билдирди.

Шундан сўнг, дунё миқёсида коррупцияга қарши курашишнинг беш йўналиши бўйича ҳисса қўшган олимлар ва тадқиқотчилар, журналистлар, инноваторлар ва фаол ташкилотлар орасидан 9 нафар ғолиблар тақдирланди.

20 декабрь куни ўтган йиллардаги ғолиблар иштирокида Ҳалоллик чемпионлари форуми Ҳалоллик чемпионлари форумининг панель сессиялари ўтказилди. Ғолиблар ўз тажрибалари билан ўртоқлашиб, коррупцияга нисбатан халқаро қарашлар, ёшлар, академик доиралар ва таълимнинг коррупциянинг олдини олишдаги роли, илмий доиралар ва инновациялар ҳамоҳанглиги масалаларини муҳокама қилишди. Алоҳида сессия доирасида коррупцияга қарши курашиш бўйича Марказий Осиё минтақавий ташаббуслари кўриб чиқилди.

Форумда Академия раҳбарияти Халқаро мукофот совриндорлари орасидаги етакчи экспертлар билан Академиянинг коррупцияга қарши курашиш соҳасидаги эксперт-таҳлилий ва таълим салоҳиятини кучайтиришга қаратилган бир қатор масалаларни муҳокама қилиб олди.