Академия фаолиятининг очиқлиги ва шаффофлигини таъминлаш йўлида

Академия ўз фаолиятини очиқлик ва шаффофлик тамойиллари асосида юритиб, ОАВ ва кенг жамоатчилик билан алоқаларни доимий мустаҳкамлаб келади. Академия тузилмасида жамоатчилик билан алоқалар бўлими фаолият юритиб келмоқда, Академия фаолиятига доир маълумотлар Академия расмий веб-сайти Рroacademy.uz, шунингдек кўп минг сонли обуначиларига эга бўлган ижтимоий тармоқлар ҳамда мессенджерлардаги янгиликлар канали ва саҳифалари орқали мунтазам эълон қилиб борилади.

Соҳада фаолият юритаётган ташкилот ва муассасалар билан, хусусан матбуот хизматлари фаолиятини мувофиқлаштирувчи ва уларга методик кўмак берувчи Ахборот ва оммавий коммуникациялар агентлиги билан яқиндан ҳамкорлик қилиб келинмоқда.

12 январь куни Ахборот ва оммавий коммуникациялар агентлигида давлат органлари ва ташкилотлар ахборот хизматлари раҳбарлари учун Ўзбекистон Президенти маслаҳатчиси Сума Чакрабартининг алоқа бўйича маслаҳатчиси Жонатан Чарлз иштирокида "Инқирозли вазиятлардаги коммуникация" юзасидан навбатдаги семинар бўлиб ўтди.

Семинарда ҳар бир соҳа фаолиятида учраши муқаррар бўлган инқирозли вазиятлардаги коммуникацияни олдиндан режалаштириш, мақсад ва вазифалар концепциясини ишлаб чиқиш, бундай ҳолатларда матбуот котиби эътибор қаратиши лозим бўлган энг асосий жиҳатлар мисоллар билан очиб берилди.

Тренинг давомида матбуот котибларига турли шаклдаги инқирозли вазиятларда коммуникация ташкил этиш ва муаммони бартараф қилиш бўйича топшириқлар берилди ва натижалар баҳоланди.

Тадбир якунида Агентликда ташкил этилган аттестациядан муваффақиятли ўтган матбуот хизмати раҳбарларига гувоҳномалар топширилди.