Академия бошлиғининг талабалар билан очиқ мулоқоти ўтказилди

2024 йил 25 январь куни Ўзбекистон Республикаси Бош прокурори ўринбосари, Ҳуқуқни муҳофаза қилиш академияси бошлиғи в.в.б. С.И.Самадов ҳамда Академия таркибий тармоқ раҳбарлари ва бакалавриат талабалари иштирокида талабаларни маънавий баркамол қилиб тарбиялаш, уларни турли зарарли ва ёт ғоялар таъсиридан асрашга бағишланган учрашувлар бўлиб ўтди.

Очиқ мулоқот жараёнида Академия раҳбари ёшларнинг ҳуқуқ ва манфаатларини ҳимоя қилиш, маънавий етук ва жисмонан соғлом баркамол авлодни вояга етказиш, ёшларнинг ўз иқтидор ва истеъдодини рўёбга чиқаришлари учун кенг шароитлар яратиш масалаларига Давлатимиз раҳбари томонидан алоҳида эътибор бериб келинаётганлигини, 2024 йилнинг “Ёшлар ва бизнесни қўллаб-қувватлаш йили” деб эълон қилинганлиги бунинг яққол мисоли эканлигини таъкидлаб ўтди. Академияда ташкил этилган ўқув жараёнининг ўзига хослиги, ички тартиб қоидаларига риоя этиш масалалари, талабаларни илмий клуб ва тўгаракларга жалб этиш, “Заковат” интеллектуал ўйинларида иштироки, иқтидорли талабаларни қўллаб-қувватлаш, ва бошқа шу каби масалалар муҳокама қилинди.

Шунингдек, талабалар ўртасида ахлоқ нормаларига зид бўлган хатти-ҳаракатларнинг олдини олиш, бу борада мустаҳкам иммунитет шакллантириш масалаларига алоҳида эътибор қаратилди.

Тадбир жараёнида Ватан ҳимоячилари куни муносабати билан январь ойида ўтказилган Академия бакалавриати талабалари ўртасида футбол бўйича чемпионат ғолиблари сертификатлар билан тақдирланди.

Бу каби тадбирлар Академияда тизимли равишда ташкил этиб келинади.