Коррупция ва хуфиёна иқтисодиётга қарши курашиш масалаларига бағишланган халқаро семинар

Ҳуқуқни муҳофаза қилиш академиясида БМТ Гиёҳвандлик ва жиноятчилик бўйича бошқармасининг Марказий Осиё бўйича ваколатхонаси ва Буюк Британиянинг Ўзбекистондаги элчихонаси билан ҳамкорликда “Амалга оширилиши мумкин бўлган коррупцияга қарши сиёсат. Бизнесда коррупцияга қарши қонунчилик ҳужжатларига риоя қилишни рағбатлантириш” мавзусида семинарда ташкил этилди.

Тадбирда коррупция ва хуфиёна иқтисодиёт муаммолари бўйича илмий-тадқиқот олиб боришда бой тажрибага эга ва дунёда таниқли бўлган Буюк Британиянинг Лондон университети профессори Муштак Хан (Mushtaq Khan) ва доктор Паллави Рой (Pallavi Roy) ўзларининг лойиҳалари ва изланиш натижалари билан бўлишишди.

Хусусан, экспертлар мамлакатлар томонидан амалга оширилаётган коррупцияга қарши курашиш дастурлари доимо кўзланган мақсад ва натижаларга олиб келмаслигини, коррупцияга қарши дастурларни ишлаб чиқишда биргаликдаги анъанавий ва ноанъанавий ёндашувларни, шу жумладан горизонтал алоқалар, ижтимоий қоидаларни инобатга олиш зарурлигини маълум қилишди.

Семинарнинг яна бир муҳим жиҳати, унда Марказий Осиё давлатлари томонидан БМТ Коррупцияга қарши конвенцияси қоидаларини янада самарали амалга ошириш бўйича ташкил этилган Минтақавий платформа иштирокчилари (Қозоғистон, Қирғизистон, Тожикистон ва Туркманистоннинг аксилкоррупция ва прокуратура органлари вакиллари) ҳам қатнашиб, коррупцияга қарши сиёсатни амалга ошириш, бизнесда коррупцияни камайтиришнинг самарали усулларини қўллашдаги билим ва кўникмаларини оширишди.

Семинарда Коррупцияга қарши курашиш агентлиги, Бош прокуратура, Иқтисодий жиноятларга қарши курашиш департаменти, Иқтисодиёт ва молия вазирлиги ходимлари, Ўзбекистон Республикаси Президенти ҳузуридаги Қонунчилик ва ҳуқуқий сиёсат институти ва Ички ишлар вазирлиги академияси вакиллари, Ҳуқуқни муҳофаза қилиш академиясининг табдир мавзуси доирасидаги тадқиқотчилар қатнашди.

Семинар давомида экспертлар иштирок этувчиларнинг қизиқтирган саволларига батафсил жавоб беришди.

Жумладан, Ўзбекистон Республикаси Президентнинг фармони билан Бош прокуратура ва Иқтисодий жиноятларга қарши курашиш департаментига яширин иқтисодиётга қарши курашиш борасида юклатилган янги вазифалардан келиб чиқиб, ушбу йўналишдаги ёндашувлар ва ижобий тажрибалар, бизнес вакилларининг коррупция учун жавобгарлиги ва шу каби бошқа масалалар юзасидан экспертларнинг фикрлари олинди.

Шунингдек, Академия томонидан Лондон университети профессорларини Ўзбекистонда хуфиёна иқтисодиётни камайтириш фаолиятига экспертлар сифатида жалб этиш, қўшма тадқиқотлар олиб бориш масалалари муҳокама қилинди.