Академияда маънавий-маърифий тадбир ташкил этилди

Ҳуқуқни муҳофаза қилиш академияси томонидан Ўзбекистон Тасвирий санъат галереясида “Жадидлар – маърифатпарварлик ва ватанпарварлик тимсоли” шиори асосида ўзига хос тадбир ўтказилди. Ушбу анжуман прокуратура органларида ва Ҳуқуқни муҳофаза қилиш академиясида олиб борилаётган маънавий-маърифий ишларнинг давоми сифатида ташкил этилган бўлиб, Академия раҳбарияти ва ходимлари, жадидшунос тарихчи олимлар, галерея масъуллари ва 100 нафардан ортиқ талаба иштирокида ўтказилди.

Тадбир давомида иштирокчиларга жадидчилик ҳаракатининг йирик намояндалари Абдулла Авлоний, Маҳмудхўжа Бехбудий ва Мунавварқори Абдурашидхонов каби буюк шахсларнинг миллий таълим ва тарбия тизимини шакллантиришдаги, шунингдек, жамиятимизни маърифатли ва замонавий йўналишларга бошлашдаги беназир ҳиссалари таъкидланди.

Шунингдек, тадбир мамлакатимиз раҳбари томонидан тасдиқланган “Прокуратура органларида маънавий-маърифий ишларни ташкил этиш концепцияси”га асосланган ҳолда, прокуратура органлари ходимлари ва академия талабаларининг дунёқараши, сиёсий онги ҳамда маънавий ва интеллектуал салоҳиятини юксалтиришга қаратилгани алоҳида қайд этилди.

Анжуман иштирокчилари шунингдек, Туркистондаги жадидчилик ҳаракатига бағишланган “Хотира йўлаги” кўргазмаси билан танишиш имкониятига эга бўлишди. Ушбу кўргазма миллий ўзликни чуқур англаш, ўтмишдан сабоқ олиш ва бугунги кунимизга ижобий таъсир кўрсата оладиган илҳомларни топиш учун бебаҳо имконият яратди.

Бу тадбир, ўзбек жамиятининг маърифий ва ватанпарварлик қадриятларига бўлган чуқур ҳурматини намоён этувчи ва келажак авлодларни улуғ аждодларимизнинг мероси билан яқиндан таништирувчи муҳим қадам бўлди.