Илм-фан ва илмий фаолиятда коррупция ва бюрократия муаммоларига бағишланган давра суҳбати ўтказилди

Ҳуқуқни муҳофаза қилиш академиясида “Илм-фан ва илмий фаолиятда коррупция ва бюрократия: муаммо ва унинг ечимлари” мавзусида республика илмий-амалий давра суҳбати ташкил этилди.

Давра суҳбатида Ҳуқуқни муҳофаза қилиш академияси, Фанлар академияси, Олий аттестация комиссияси, Коррупцияга қарши курашиш агентлиги, Олий таълим, фан ва инновациялар вазирлиги, Инновацион ривожланиш агентлиги, Давлат ва ҳуқуқ институти, Судьялар олий мактаби, Инсон ҳуқуқлари бўйича Ўзбекистон Республикаси Миллий маркази, Тошкент давлат юридик университети, Ички ишлар вазирлиги академияси, Жамоат хавфсизлиги университетининг профессор-ўқитувчилари ва илмий тадқиқотчилари иштирок этди.

Тадбир иштирокчилари олий малакали илмий ва илмий-педагог кадрларни аттестациядан ўтказишда коррупция ҳолатини олдини олиш ва бюрократик тўсиқларни бартараф этиш, илмий даражали кадрларни тайёрлаш бўйича долзарб масалалар, академик ҳалоллик каби чиқишлар билан фикр алмашишди.

Қайд этиш ўринлики, Ҳуқуқни муҳофаза қилиш академиясида 2020 йилдан буён республика ва дунёда ягона бўлган “12.00.12 – Коррупция муаммолари (юридик фанлар)” ихтисослиги бўйича Илмий кенгаш фаолият юритади.

Ҳозирда мазкур ихтисослик бўйича жами 40 дан зиёд (PhD ва DSc) таянч докторантлар ва мустақил изланувчилар илмий тадқиқотларни олиб бормоқда. Коррупцияга қарши курашишнинг долзарб мавзулари бўйича 10 га яқин ҳимоялар ўтказилди.

Шу билан бирга, Академияда илмий изланиш олиб борилаётган жами тадқиқотларнинг тўртдан бир қисми ёки 28 фоизи бевосита коррупция ва унинг муаммолари билан боғлиқ масалаларга бағишланган. Масалан бошқа ихтисосликлар (12.00.07, 12.00.08 ва 12.00.09) бўйича ҳам 30 нафарга яқин тадқиқотчилар турли соҳа ва йўналишлардаги коррупциянинг олдини олиш мавзуларида илмий янгиликларни тадқиқ қилмоқда.

Тадбир натижалари бўйича иштирокчилар илм-фан ва илмий фаолиятда мавжуд коррупция ва бюрократик муаммоларини батафсил муҳокама қилиб, уларни бартараф қилишга қаратилган илмий-амалий таклифларни илгари суришди.

Давра суҳбати якунлари бўйича қайд этилган муаммоларга бағишлаб илмий мақолалар тўплами нашр этилиши режалаштирилмоқда.