Япония олий таълим муассасалари билан ҳамкорлик

Ўзбекистон Республикаси Ҳуқуқни муҳофаза қилиш академияси вакиллари Ўзбекистон Республикаси Адлия вазири ўринбосари бошчилигидаги делегация таркибида Япония Адлия вазирлиги ҳамда олий таълим муассаслари билан ҳуқуқ соҳасидаги ўзаро ҳамкорлик алоқаларини мустаҳкамлаш мақсадида Япония давлатига ишчи ташрифини амалга оширдилар.

Ташриф доирасида Япония олий таълим муассасалари вакиллари, Японияда таҳсил олаётган ўзбекистонлик талабалар, шунингдек Ўзбекистоннинг Япониядаги элчихонаси ходимлари балан учрашувлар ташкил этилди.

Учрашувлар давомида юқори малакали ҳуқуқшунос кадрларни тайёрлаш қамровини ошириш, юриспруденция ва ҳуқуқни муҳофаза қилиш  соҳасига оид янги таълим йўналишлари бўйича ҳамкорликни йўлга қўйиш, шунингдек  Нагоя иқтисодиёт университети, Дошиша, Осака ва Тсукуба университетлари билан ҳамкорликни кенгайтириш масалалари муҳокама қилинди.

Нагоя иқтисодиёт университети (Nagoya Economic University) Президенти Харуо Сабури билан учрашув жараёнида Университетда мамлакатимиз юридик олий таълим муассасалари профессор-ўқитувчилари малакасини ошириш имкониятларини яратиш масалалари муҳокама қилинди.

Киото шаҳрининг Дошиша университети (Doshisha University) халқаро алоқалар ва ҳуқуқ маркази вакиллари билан учрашув доирасида мазкур марказ билан ўқув адабиётлари алмашинувини йўлга қўйиш, қўшма илмий лойиҳаларни ташкил этиш, қўшма дарслик ва илмий мақолалар чоп этиш юзасидан келишувга эришилди.

Top Global University лойиҳасида энг яхши университетлар рўйхатига ҳамда Япониянинг энг яхши учта давлат университетлари қаторига кирувчи Осака университетида (Osaka University) Ҳуқуқ факультети раҳбариятибилан, шунингдек Осака университетида таҳсил олаётган юртимиз талабалари билан учрашувлар ташкил этилди.

Ташриф давомида шунингдек Top Global University Project доирасида энг яхши тўққизта миллий олий ўқув юртларидан бири сифатида танланган Тсукуба университетида (University of Tsukuba) мазкур университет раҳбарияти билан учрашув ташкил этилди. Учрашувда профессор-ўқитувчиларнинг малакасини ошириш бўйича ўзаро алмашинув дастурини жорий қилиш, ҳуқуқ соҳасига оид илмий ишлар олиб бориш ҳамда бошқа йўналишларда ўзаро ҳамкорлик қилиш масалалари муҳокама қилинди.

Ташриф доирасида Ўзбекистон Республикаси Ҳуқуқни муҳофаза қилиш академияси ҳамда Нагоя университети, Осака университети, Дошиша университети қошидаги Халқаро алоқалар ва ҳуқуқ маркази,  Тсукуба университети билан ҳамкорликни йўлга қўйиш бўйича музокаралар олиб боришга келишиб олинди.