Ҳуқуқни муҳофаза қилиш академиясида Хон атлас ҳафталиги  

Ўзбекистон Республикаси Ҳуқуқни муҳофаза қилиш академиясида бутун республика миқёсида барча давлат ва нодавлат ташкилотлари тмонидан кенг ўтказиб келинаётган  “Хон атлас ҳафталиги” юқори савияда ташкил этилди.

Мазкур тадбир халқимиз маданияти, урф-одати ва қадриятлари, дид ва эстетик қарашлари шунингдек ташқи қиёфасини либос борасидаги ўзига хос жиҳатларини намойиш этиш, талаба қизлар, турли ташкилотларда фаолият кўрсатаётган ходимлар ўртасида миллий қадриятларни тарғиб этиш, уларнинг кийиниш услубини янада такомиллаштириш, кийиниш маданиятига янги услуб ва тамойилларни тавсия этиш мақсадида ташкил этилган.

“Хон атлас ҳафталиги” доирасида Академияда фаолият юритаётган аёл ходимлар, талаба-қизлар миллий матоларимиз атлас ва адрасдан тикилган либосларни кийиш баробарида, мавзуга оид давра суҳбати ҳам ташкил этилди.

Давра суҳбати давомида миллий матоларимиз бўлмиш атлас ва адраснинг ўзига хослиги, табиийлиги ва нафислиги, миллий либосларимизнинг бежирим дид ва функционаллиги борасида фикр алмашилди.

Академия талаба қизлари бадиий чиқишлар қилишди, давра суҳбати давомида талаба қизларга нафосат, гўзаллик ва ўзбек аёл-қизларига хос бўлган маънавий фазилатлар ҳақида маълумотлар берилди.