ЕХҲТнинг Ўзбекистондаги лойиҳалари координатори Антти Карттуненнинг Ҳуқуқни муҳофаза қилиш академиясига ташрифи

Жорий йилнинг 22 апрель куни Европада хавфсизлик ва ҳамкорлик ташкилоти (ЕХҲТ) билан ҳамкорликда прокуратура ва тергов органлари ходимлари учун “Очиқ манбалардан маълумотлар олиш ва уларни таҳлил қилиш, шунингдек онлайн тергов қилиш” мавзусида ташкил қилинган семинар-тренинг доирасида ЕХҲТнинг Ўзбекистондаги лойиҳалари координатори сифатида ўз ишини бошлаган Антти Карттуненнинг Ўзбекистон Республикаси Ҳуқуқни муҳофаза қилиш академиясига ташрифи амалга оширилди.

Тренинг АКТ қўллаган ҳолда содир этилган жиноятларни тергов қилиш соҳасида катта амалий тажрибага эга бўлган халқаро экспертлар томонидан ўтказилмоқда.

Ташриф давомида меҳмон Академия фаолияти, прокуратура ва тергов органлари ходимларини ўқитиш жараёни, таълимда қўлланилаётган янги педагогик усуллар ва замонавий технологиялар, ўқув инфраструктураси, профессор-ўқитувчилар ва тингловчиларга яратилган шароитлар ҳамда қурилаётган янги ўқув комплекси ва ободонлаштириш ишлари билан таништирилди.

Конструктив руҳда ўтказилган тадбирда, элчи Антти Карттунен Академия фаолияти унда катта таассурот қолдирганини ва келгусида ҳамкорликни янада кучайтириш, амалий тадбирлар ва самарали лойиҳалар сонини кўпайтириш лозимлигини таъкидлаб ўтди.