“Юридик фан ва ҳуқуқни қўллаш амалиётининг долзарб масалалари”  республика илмий-амалий конфренцияси

Ўзбекистон Республикаси Ҳуқуқни муҳофаза қилиш академиясида “Юридик фан ва ҳуқуқни қўллаш амалиётининг долзарб масалалари” мавзусида республика илмий-амалий конфренция ташкил этилди.

Конфренцияда Ўзбекистон Республикаси Бош прокуратураси, Коррупцияга қарши курашиш агентлиги, Олий таълим, фан ва инновациялар вазирлиги, Судьялар олий кенгаши ҳузуридаги Судьялар олий мактаби, Инсон ҳуқуқлари бўйича Ўзбекистон Республикаси Миллий маркази, Тошкент давлат юридик университети, Ички ишлар вазирлиги академияси, Жамоат хавфсизлиги университети, Юристлар малакасини ошириш маркази, Ўзбекистон Республикаси Фанлар академияси Давлат ва ҳуқуқ институти профессор-ўқитувчилари, ёш олимлар ва илмий тадқиқотчилари иштирок этди.

Конфренция ҳар йили анъанавий шаклда Академия томонидан ўтказиб келинади ва унда мамлакатимизда юридик фан соҳасининг етук олимлари мунтазам равишда иштирок этадилар.

Тадбирнинг асосий мақсади юртимизда юридик фанни ривожлантириш, фан билан амалиёт уйғунлигини таъминлаш, бу борадаги мавжуд муаммоларни аниқлаш ва уларни илмий-назарий ва амалий жиҳатдан ҳал қилиш истиқболлари ҳамда асосий йўналишларини белгилаш борасида ўзаро фикр алмашишдан иборатдир.

Конфренция доирасида юридик фан йўналишида: Ўзбекистон Республикасида юридик фан ва ҳуқуқни қўллаш амалиётини такомиллаштириш, ҳуқуқшуносликка оид илмий ишларни ривожлантиришнинг долзарб муаммолари, илмий фаолиятда бюрократия ва коррупцияни олдини олиш истиқболлари; давлат бошқарув йўналишида: давлат хизматчилари фаолиятини баҳолашнинг ташкилий-ҳуқуқий асосларини такомиллаштириш, давлат ва жамият манфаатларини ҳимоя қилиш, бунда прокуратура органларининг ўрни ва аҳамиятини таҳлил қилиш, суд амалиётида қонунчилик ҳужжатларини қўллаш жараёнидаги муаммолар; жиноят ҳуқуқи ва жиноят процесси йўналишида: жиноят ҳуқуқи соҳасидаги илмий-назарий билимларни амалда қўллашнинг долзарб муаммолари, жиноят процессида шахсни реабилитация этиш соҳасидаги халқаро стандартлар, терговчининг процессуал мустақиллигини таъминлаш истиқболлари каби бошқа долзарб масалалар муҳокама этилди.

Тадбир иштирокчилари конфренция доирасида юридик фан соҳасидаги мавжуд муаммолар, уларни бартараф этиш йўллари, ислоҳотлар замирида илм-фан соҳасига эътиборни кучайтириш, илмий фаолиятда мавжуд сунъий тўсиқларни бартараф этиш, юридик таълим муассасалари билан ҳамкорликда қўшма тадқиқотларни амалга ошириш каби масалаларига алоҳида тўхталиб, назария ва амалиётни уйғунлаштириш, қонундаги бўшлиқларни бартараф этиш юзасидан муҳим таклифлар илгари сурилди.  

Конфренция якунлари бўйича илмий мақолалар тўплами нашр этилиши режалаштирилган.