Кибержиноятларга қарши курашиш бўйича халқаро конференцияда иштирок этилди

Ўзбекистон Республикаси Ҳуқуқни муҳофаза қилиш академияси вакиллари Минск шаҳрида Беларусь Республикаси Тергов қўмитаси институти томонидан ташкил этилган “Рақамли активлардан фойдаланган ҳолда содир этилган жиноятларга қарши кураш” мавзусидаги халқаро илмий-амалий конференцияда иштирок этишди.

Ушбу тадбир Беларусь, Россия Федерацияси, Ўзбекистон Республикаси ва Қозоғистон Республикасининг рақамли активлар билан боғлиқ жиноятларга қарши курашишга ихтисослашган етакчи эксперт ва амалиётчиларни бирлаштириш мақсадида ташкил этилди.

Конференцияда Беларусь Республикаси Тергов қўмитаси раиси Дмитрий Гора, турли мамлакатларнинг ҳуқуқ-тартибот идоралари вакиллари, молиявий мониторинг бўйича мутахассислар, шунингдек, ушбу масала бўйича тадқиқот олиб бораётган олимлар ва экспертлар иштирок этди. Иштирокчилар халқаро ҳамкорлик муаммоларини, рақамли активларни тартибга солишга мувофиқлаштирилган ёндашувлар зарурлигини, кибержиноятларни тергов қилиш бўйича тажриба алмашиш ва турли давлатларнинг тегишли органлари ўртасида тезкор ҳамкорлик механизмларини муҳокама қилдилар.

Анжуман натижасига кўра, иштирокчилар рақамли активлар билан боғлиқ жиноятларни тергов қилиш бўйича қимматли амалий тажриба алмашишди. Бу борадаги жиноятчиликка қарши курашиш учун OSINT, рақамли криминалистика ва солиқ назоратининг илғор усулларини жорий этишга алоҳида эътибор қаратилмоқда. Шу билан бирга, рақамли активлар муомаласини тартибга солишнинг ҳуқуқий асосларини такомиллаштириш ва бу борадаги халқаро ҳамкорликни мустаҳкамлаш зарурлиги қайд этилди.