Жиноят ишлари бўйича қидирув фаолиятининг криминалистик ва процессуал жиҳатларига бағишланган халқаро конференцияда эштирок этилди

Ўзбекистон Республикаси Ҳуқуқни муҳофаза қилиш академияси вакиллари Россия Федерацияси Тергов қўмитаси Санкт-Петербург академияси томонидан “Жиноят ишлари бўйича қидирув фаолиятининг криминалистик ва процессуал жиҳатлари” мавзусида ташкил этилган халқаро илмий-амалий конференцияда онлайн тарзда иштирок этишди.

Конференция ишида Беларусь Республикаси, Россия Федерацияси, Қозоғистон ва Ўзбекистоннинг ихтисослаштирилган ўқув юртлари профессор-ўқитувчилари, илмий ходимлари ва тадқиқотчилари, тингловчилари ҳамда ҳуқуқ-тартибот идоралари ходимлари қатнашишди.

Тадбир очилиш маросимида Ўзбекистон Республикаси Ҳуқуқни муҳофаза қилиш академияси бошлиғи ўринбосари У.У. Нигмаджанов ўзининг табрик сўзи билан иштирок этиб, конференция мавзусининг бугунги кундаги долзарблигини таъкидлаб, жиноят ишлари бўйича қидирув фаолиятида илм-фан ҳамда амалиётнинг ўзаро узвий боғлиқлигининг аҳамиятига тўхталиб ўтди.

Конференция давомида иштирокчилар томонидан қидирув фаолиятининг ҳуқуқий асослари, субъектлари ва объектлари, қидирув бўйича тергов ва бошқа процессуал ҳаракатлар тактикаси, терговчининг дастлабки тергов пайтида ва уни тўхтатиб қўйгандан кейин қидирув фаолияти алгоритмлари, терговчи ва ҳуқуқ-тартибот идораларининг ўзаро ҳамкорлиги жиҳатлари, шунингдек тезкор-қидирув жараёнида АКТ, интернет-ресурслари ва ижтимоий тармоқлардан фойдаланиш имкониятлари ва бошқа масалалар муҳокама қилинди.