Страсбург шаҳридаги Европа Кенгаши семинарида иштирок этилди

Ўзбекистон Республикаси Ҳуқуқни муҳофаза қилиш Академияси вакиллари Европа Кенгашининг Марказий Осиёда қонун устуворлиги дастури доирасида Европа Кенгаши штаб-квартирасида (Страсбург, Франция) Ўзбекистон делегацияси учун ташкил этилган семинарда иштирок этишди.

Семинарда прокуратура органлари ходимлари учун Европа Кенгашининг Марказий Осиёда 2020–2023 йилларда қонун устуворлигини таъминлаш “HELP” (юридик мутахассислар учун инсон ҳуқуқлари бўйича таълим) дастури доирасида Ўзбекистонда амалга оширилган ишлар муҳокама қилинди.

Шунингдек, Европа Кенгашининг муҳим конвенциялари бўйича хабардорликни ошириш, конвенциялар мазмунини тўғри англаш, конвенция ва бошқа халқаро стандартлар талабларини самарали амалга ошириш масалалари юзасидан Европа Кенгаши экспертлари маълумотлар беришди.

Уч кун давом этган тадбирда Европа Кенгашининг Инсон ҳуқуқлари ва қонун устуворлиги Бош бошқармаси раҳбари Фредерик Долт, Марказий Осиёда қонун устуворлигини таъминлаш “HELP” дастури координатори Кристина Хохлова, Европа Кенгаши дастурларини мувофиқлаштирувчи раҳбари Клаус Нойрикх ва бир қатор бошқа экспертлар иштирок этди.

Европа Кенгаши экспертлари Марказий Осиёда қонун устуворлиги дастури доирасида Ўзбекистон билан кейинчалик ҳам ҳамкорлик қилишдан мамнун эканликларини билдиришди.