ЮНЕСКО билан ҳамкорликда ахборот олиш ва сўз эркинлиги масалалари бўйича тренинг ташкил этилди

Ҳуқуқни муҳофаза қилиш академиясида ЮНЕСКО томонидан сўз эркинлиги ва ахборот олиш эркинлиги ва кафолатлари, журналистлар хавфсизлигини таъминлаш масалаларига бағишланган семинар ўтказилди.

Икки ҳафта давом этган тадбир Швейцария тараққиёт ва ҳамкорлик агентлиги (SDC) ва ЮНЕСКОнинг Журналистлар хавфсизлиги бўйича донорлик дастури (MDP) томонидан молиялаштирилган “Aхборотдан фойдаланиш, институционал жавобгарлик ва оммавий ахборот воситалари компетенциясини кучайтириш орқали Ўзбекистон ҳукумати ва фуқароларининг имкониятларини кенгайтириш” дастури доирасида ташкил этилди. Дастур фуқароларнинг ахборотдан фойдаланиш имкониятларини ошириш, институционал масъулиятни кучайтириш ва кадрлар салоҳиятини оширишга қаратилган.

Сўз эркинлиги, журналистлар ҳуқуқларини ҳимоя қилиш жараёнида ҳуқуқни муҳофаза қилувчи органлар вакиллари хабардорлигини ошириш ҳамда салоҳиятини мустаҳкамлаш муҳим ҳисобланади. Ташкил этилган семинар ЮНЕСКО томонидан амалга оширилаётган катта ташаббуснинг бир қисми ҳисобланади.

Тренинг журналистик фаолиятни муҳофаза қилиш ҳамда сўз ва ахборот олиш эркинлигини таъминлаш соҳасида катта иш тажрибасига эга бўлган халқаро эксперт Сабин Оуллет (Канада) томонидан ўтказилди. Тадбирда Ҳуқуқни муҳофаза қилиш академияси профессор-ўқитувчилари ҳамда тадқиқотчилари, прокуратура ва Мажбурий ижро бюроси вакиллари иштирок этди.

Семинар давомида сўз эркинлигининг асосий тамойиллари, халқаро стандартларни амалиётга жорий этишнинг механизмлари, очиқ маълумотларга эга бўлиш, оммавий ахборот воситаларининг яхлитлиги ва журналистлар хавфсизлигини таъминлаш каби долзарб мавзулар бўйича иштирокчиларнинг билим ва салоҳиятлари оширилди.

Тадбир якунида иштирокчиларга сертификатлар топширилди.