“Оилавий зўравонликка қарши кураш: миллий ва хорижий қонунчилик таҳлили” мавзусида давра суҳбати ўтказилди

Ўзбекистон Республикаси Ҳуқуқни муҳофаза қилиш академиясида “Оилавий зўравонликка қарши кураш: миллий ва хорижий қонунчилик таҳлили” мавзусида давра суҳбати ўтказилди.

Тадбирда Академия профессор-ўқитувчилари, мустақил изланувчилари ва таянч докторантлари, Ўзбекистон Миллий университети, Тошкент давлат юридик университети, Ички ишлар вазирлиги академияси, Криминология тадқиқот институти, Ўзбекистон Республикаси Оила ва хотин-қизлар қўмитаси ҳузуридаги “Оила ва гендер” илмий тадқиқот институти вакиллари иштирок этишди.

Давра суҳбатининг асосий мақсади Академиянинг илмий ва таҳлилий фаолияти доирасида ўтказилган тадқиқот ва ўрганишлар натижаларини тақдим қилиш, тажрибали ҳамда ёш олимлар, тадқиқотчилар, амалиётчи экспертлар иштирокида оилавий зўравонлик, аёлларга қарши жиноятларнинг олдини олиш ва уларга қарши курашиш соҳасидаги қонунчилик ва ҳуқуқни қўллаш амалиётини такомиллаштиришга хизмат қиладиган таклиф ва тавсияларни ишлаб чиқиш, келгусида амалга оширилиши лозим бўлган тадқиқотлар векторини аниқ белгилаб олишдан иборат.

Тадбирда сўзга чиққан маърузачилар юртимизда мазкур соҳага кўрсатилаётган эътибор ва амалга оширилаётган изчил ислоҳотлар борасида сўз юритиш баробарида аёлларга нисбатан оиладаги зўравонлик сабаблари ва ижтимоий зарарлилиги, оиладаги зўравонликнинг жиноят-ҳуқуқий ва криминологик жиҳатлари, шахснинг шаклланиши ва оилавий зўравонлик превенцияси, жамият томонидан оилавий зўравонлик муаммосининг идрок этилиши ва бошқа долзарб масалалар фанлараро ёндашув асосида муҳокама ва таҳлил қилинди.

Давра суҳбати якунида соҳа экспертлари ва тадқиқотчилар томонидан оиладаги зўравонликнинг олдини олишга қаратилган долзарб мавзулар ва амалий тадқиқот ишларини давом эттириш бўйича навбатдаги қадамлар белгилаб олинди.