Жойларда “Ватаннинг содиқ ёшлари” мавзусидаги ўқув йиғинлари давом этмоқда

Ёшларни ҳар томонлама қўллаб-қувватлаш, уларнинг замонавий билим ва касб-ҳунарларни эгаллаши учун зарур шарт-шароитлар яратишга алоҳида эътибор қаратиш юртимизда ёшларга оид сиёсатнинг устувор йўналишларидан бири ҳисобланади.

Ўзбекистон Республикаси Ҳуқуқни муҳофаза қилиш академияси томонидан жойларда ёшлар билан тизимли ишлаш доирасида ҳудудий прокуратура органлари билан ҳамкорликда “Ватаннинг содиқ ёшлари” мавзусидаги ўқув йиғинлари ташкил этиб келинмоқда.

Мазкур ўқув йиғинлари махсус дастур асосида ташкил этилган бўлиб, унда ўқув ва амалий машғулотлар комплекси ҳамда ёшларнинг муаммоларини ўрганиш назарда тутилган.

Навбатдаги ўқув йиғинлар Тошкент шаҳрининг Бектемир туманида 175 нафар ёшлар, шу жумладан 88 нафар хотин-қизлар иштирокида ўтказилди.

Ўқув йиғини дастури ёшларни психологик таъминлаш, касбга йўналтириш, бандликка кўмаклашиш, ҳуқуқий билимлар бериш, ватанпарварлик, Ватан тақдирига дахлдорлик, ўз юртига ва халқига муҳаббат туйғуларини сингдириш, оила, фарзанд тарбиясига бефарқ бўлмаслик каби фазилатларни шакллантиришга қаратилган муҳим мақсадларни қамраб олган.

Машғулотлар нафақат Академиянинг юқори малакали мутахассислари томонидан, балки мамлакатимизда танилган психологлар, педагоглар, юристлар ва мураббийлар, халқаро ташкилотларнинг, хусусан UNICEF экспертлари ва волонтёрлари томонидан интерактив методларни қўллаган ҳолда ўтказилди.