Юнусобод туманида “Ватаннинг содиқ ёшлари” мавзусидаги ўқув йиғини

Ҳуқуқни муҳофаза қилиш академияси томонидан хотин-қизлар учун махсус ишланган дастур асосида ташкил этилган “Ватаннинг содиқ ёшлари” мавзусидаги ўқув йиғини жойларда давом этмоқда.

Мазкур ўқув йиғини доирасида пойтахтнинг барча туманларидан
1 минг 500 нафардан ортиқ ёш хотин-қизларнинг қамраб олиниши режалаштирилган.

Навбатдаги ўқув йиғини Юнусобод туманида ташкил этилиб, унда Тошкент шаҳрининг Юнусобод ва Шайхонтоҳур туманларидан 100 нафарга яқин хотин-қизлар иштирок этишди.

Ўқув йиғини дастури ёшларни психологик таъминлаш, касбга йўналтириш, бандликка кўмаклашиш, ҳуқуқий билимлар бериш, ватанпарварлик, Ватан тақдирига дахлдорлик, ўз юртига ва халқига муҳаббат туйғуларини сингдириш, оила, фарзанд тарбиясига бефарқ бўлмаслик каби фазилатларни шакллантиришга қаратилган муҳим мақсадларни қамраб олган.

Машғулотлар нафақат Академиянинг малакали мутахассислари томонидан, балки республикамизда танилган психологлар, педагоглар, юристлар ва мураббийлар томонидан интерактив методларни қўллаган ҳолда ўтказилмоқда. Бу ўз навбатида курснинг натижадорлигига ижобий таъсир ўтказади.

Ўқув йиғинида иштирокчиларга юртимизда ёшлар учун касб эгаллаш, билим олиш, тадбиркорлик фаолиятини амалга ошириш, хорижий тилларни ўрганиш ва бошқа йўналишларда давлатимиз томонидан бериладиган имтиёзлар ва имкониятлар ҳақида маълумотлар берилди.

Ўқув йиғини доирасида шунингдек ҳар бир иштирокчи хотин-қизнинг муаммолари анкета-сўровнома асосида алоҳида ўрганилиб, уларни ҳал этишда кўмаклашиш юзасидан амалий чоралар кўрилмоқда.

Ўқув йиғинлари пойтахтнинг барча туманларида давом эттирилади.