Туркиянинг Анқара шаҳрида ўтказилган кибержиноятларга қарши курашиш бўйича халқаро тренингда иштирок этилди

Ўзбекистон Республикаси Ҳуқуқни муҳофаза қилиш академияси ходимлари ва магистратура тингловчиларидан иборат делегация Туркия Адлия академияси билан имзоланган ўзаро англашув меморандумига асосан кибержиноятларга қарши курашиш масалаларига бағишлаб Туркиянинг Анқара шаҳрида ташкил этилган халқаро тренингда иштирок этди.

Халқаро тренинг очилиш маросимида Академия бошлиғининг биринчи ўринбосари Е.В.Коленко маъруза қилиб, иккала ўқув муассасаси ўртасидаги бугунги кундаги ўзаро ҳамкорлик алоқалари, қўшма илмий тадбирлар ва лойиҳалар, келгуси режаларга тўхталиб ўтиб, тренинг мавзусининг делегация аъзолари учун долзарблигига алоҳида урғу берди ва кибержиноятчиликнинг олдини олиш ва унга қарши курашиш йўналишида кадрлар салоҳиятини юксалтириш борасида Академия тажрибаси билан ўртоқлашди.

Тадбир дастури асосида Туркия Олий кассация суди судьяси, доктор Саджит Йылмаз, Анқара ижтимоий фанлар университети ҳуқуқ факультети илмий ходими, доктор Бурак Боз, Конституциявий суди судьяси доктор Хабиб Ўз томонидан “БМТнинг механизмлари ва ҳужжатлари нуқтаи назаридан кибержиноятларга қарши курашиш”, “Европа Кенгаши доирасида кибержиноятчиликка қарши курашиш”, “Инсон ҳуқуқлари бўйича Европа судининг кибержиноятлар бўйича қарори” мавзулари бўйича тақдимотлари бўлиб ўтди.

Маърузачилар бугунги рақамли дунёда киберхавфсизлик муҳим масалага айланганлиги, БМТ, Европа кенгаши томонидан кибержиноятчиликка қарши курашишда инсон ҳуқуқларини ҳимоя қилиш бўйича амалга оширилаётган ишлар, қабул қилинган ҳужжатлар, кибержиноятчилик бўйича жисмоний ва юридик шахсларнинг мурожаатларини кўриб чиқиш билан боғлиқ масалаларга тўхталиб ўтдилар.

Тадбир доирасида шунингдек делегациянинг Туркия Адлия вазирлиги, Олий кассация суди, Конституциявий суди, Судья ва прокурорлар кенгашига ташрифлари амалга оширилиб, учрашувлар ўтказилди, ушбу ташкилотларнинг кибержиноятчиликка қарши курашиш фаолияти ва тажрибалари ўрганилди.

Тренинг якунида Туркия Адлия академияси томонидан тадбир иштирокчиларига тегишли сертификатлар тақдим этилди.