Озарбайжон Республикасининг Баку шаҳрида “Турк давлатларининг рақамлаштириш ва ҳуқуқни қўллаш фаолиятидаги ҳамкорлик” мавзусида конференция бўлиб ўтди

Конференцияда Ўзбекистон, Озарбайжон, Қозоғистон, Қирғизистон, Туркия ҳамда Шимолий Кипр Турк Республикаларининг прокурорлар ва судьяларни тайёрлаш ва малакасини ошириш муассасалари ва прокуратура ҳамда суд органларининг вакиллари иштирок этишди.

Ушбу конференцияни ташкил этишдан кўзланган мақсад турк давлатларида фуқаролик қонунчилиги таҳлили ва улардаги ўхшашликлар, прокуратура ва суд органлари фаолиятига электрон-ахборот тизимини жорий этиш ва фойдаланиш, илмий изланишлар ҳамда судья ва прокурорларни ўқитиш соҳасидаги электрон ахборот технологияларининг аҳамияти масалаларини муҳокама қилишдан иборат.   

Ўзбекистон Республикаси Ҳуқуқни муҳофаза қилиш академияси вакиллари А.Е.Ибраймов “Прокуратура органларида электрон ахборот тизимлари асосида малака ошириш жараёнини жорий этиш механизмлари: илмий асосланган амалиёт ва самарадорлик” мавзусида ҳамда Ш.К.Матчанов “Ўзбекистон Республикаси прокуратура органлари фаолиятида электрон ахборот тизимлари” мавзусида маърузалар билан иштирок этдилар.

Конференцияда туркий давлатлар фуқаролик қонунчилиги, прокуратура ва суд органлари фаолиятига электрон-ахборот тизимини жорий этиш ва фойдаланиш, илмий изланишлар ҳамда судья ва прокурорларни ўқитиш соҳасида электрон ахборот технологияларини қўллаш борасида тажриба алмашиш ва ўзаро алоқаларни мустаҳкамлаш ва келажакда уни янада бойитишга замин яратилди.