Академия делегацияси Корея Республикаси Миллий криминалистика хизматига ташриф буюрди

Рақамли криминалистика соҳасидаги илғор тажрибани ўрганиш ва Ўзбекистон Республикаси Президентининг Рақамли криминалистика соҳасидаги илмий-тадқиқот фаолиятини ташкил этиш чора-тадбирлари тўғрисида"ги ПҚ–229-сон Қарорида белгиланган вазифаларни бажариш мақсадида Ўзбекистон Республикаси Ҳуқуқни муҳофаза қилиш академияси делегацияси Корея Республикаси Ички ишлар ва хавфсизлик вазирлиги ҳузуридаги Миллий криминалистика хизматига ташриф буюрди. Делегацияни Корея Республикаси криминалистика хизмати директори ўринбосари жаноб Ши Кю Сун кутиб олди.

Ташриф давомида Академия вакиллари рақамли криминалистика вазифаларини ҳал қилиш учун хизматда қўлланиладиган илғор технологиялар ва ресурслар билан танишдилар. Рақамли далилларни таҳлил қилиш, бузилган маълумотларни тиклаш, зарарли дастурий таъминотни ўрганиш, шунингдек фото- видео материаллар ва мобил қурилмалар билан ишлаш каби жиҳатларга алоҳида эътибор қаратилди.

Замонавий криминалистик тадқиқотларда долзарб вазифа бўлган расм ва видео материалларда юзларни идентификация қилиш технологиялари ўрганилди. Олинган билим ва кўникмалар босқичма-босқич амалий фаолиятга жорий этилади ҳамда Академия мутахассисларининг малакасини ошириш ва ушбу соҳадаги илмий-тадқиқот ишларини такомиллаштириш учун фойдаланилади.

Тренинг давомида самарали тажриба алмашинуви бўлиб ўтди, корейс ҳамкорлар билан келгусидаги ҳамкорлик истиқболлари муҳокама қилинди. Хизмат ходимлари ва Ўзбекистон делегацияси ўртасида ҳамкорлик муносабатлари ўрнатилди, бу эса халқаро алоқаларни мустаҳкамлаш ва мамлакатнинг криминалистик тадқиқотлар соҳасига илғор технологияларни жорий этиш йўлидаги муҳим қадам бўлади. Бу илмий-тадқиқот фаолиятини ривожлантириш ва рақамли тергов самарадорлигини оширишга ёрдам беради.

Бундан ташқари, Корея Республикасига ташриф доирасида делегация томонидан Сеул шаҳри полиция агентлигининг рақамли криминалистика департаменти, шунингдек Корея Республикаси Мудофаа вазирлиги ҳузуридаги Илмий кибертергов бўлимига ташриф буюрилди. Танишув учрашувлари давомида экспертлар рақамли криминалистик тадқиқотлар ўтказиш бўйича тажриба алмашдилар, шунингдек делегация касбий фаолиятда қўлланиладиган замонавий дастурий ва аппарат-дастурий воситалар билан таништирилди.