Профессор-ўқитувчиларнинг педагогик маҳоратини ошириш бўйича навбатдаги семинар-тренинг

Ҳуқуқни муҳофаза қилиш академиясида профессор-ўқитувчиларнинг педагогик маҳоратини ошириш, таълим жараёнига инновацион технологиялар ва методикаларни жорий этиш мақсадида изчил ва тизимли ишлар олиб борилмоқда.

Мазкур фаолият доирасида Академияда Низомий номидаги Тошкент давлат педагогика университети Педагогика кафедраси доценти, п.ф.ф.д. (PhD) А.А.Вахобов иштирокида “Кўникмаларга асосланган таълим, 4К креатив салоҳиятни ривожлантириш технологияси” мавзусида навбатдаги семинар-тренинг ташкил этилди.

Семинар-тренингда олий таълим муассасаларида малакали кадрлар тайёрлашда замонавий ёндашувлардан ҳисобланган компетенцияга асосланган таълимнинг мазмун-моҳияти, унинг ўзига хос хусусиятлари, талабаларда юмшоқ кўникмаларни ривожлантиришга қаратилган 4К (коммуникация, коллаборация, креативлик, критик фикрлаш) моделининг асосий компонентлари, шунингдек юмшоқ кўникмаларни шакллантириш усуллари ҳақида батафсил тушунтириш берилди. Тадбир давомида иштирокчилар амалий машқларни бажаришга жалб қилинди.

Семинар-тренинг иштирокчилари ўзларини қизиқтирган саволларга батафсил жавоб олдилар.