Академияда Ўқитувчи ва мураббийлар куни муносабати билан байрам тадбири ташкил этилди

Ўзбекистон Республикаси Ҳуқуқни муҳофаза қилиш академиясида 1 октябрь – Ўқитувчи ва мураббийлар кунига бағишланган байрам тадбири бўлиб ўтди.

Тадбирда Бош прокуратура раҳбарияти, Ўзбекистон прокуратура органлари фахрийларини ижтимоий қўллаб-қувватлаш жамоатчилик маркази раҳбарияти, Академия профессор-ўқитувчилари ва ходимлари, талабалар, ОАВ вакиллари иштирок этдилар.

Байрам тадбирини Ўзбекистон Республикаси Бош прокурори ўринбосари Шоҳрух Азаматович Аминов очиб бериб, Ўзбекистон Республикаси Бош прокурорининг ўқитувчи ва мураббийларга байрам табригини ўқиб эшиттирди.

Табрик сўзида Бош прокуратура академиясида негизида салкам икки йил олдин барпо этилган Ҳуқуқни муҳофаза қилиш академиясининг қисқа давр ичида қўлга киритган ютуқлари эътироф этилди.

Хусусан, 2024 йилда кенг жамоатчилик ўртасида ўтказилган сўровнома натижасига кўра, “Йилнинг энг яхши таълим муассасалари–2024” танловида Академиянинг биринчи ўринни эгаллади.

Юртимиз бўйича жорий йилда олий таълим муассасаларига бир ўринга ўқишга кириш учун бакалавриатда ўртача 4,3 нафар, магистратурада 1,4 нафар номзод тўғри келган бўлса, Академияда бир ўринга ўқишга кириш учун бакалавриатда 20 нафар, магистратурада 61 нафар номзод тўғри келди.

Ҳозирда Академияда таълим олувчилар қарийб 1 минг 200 нафарни ташкил этмоқда.

Шунингдек 2 минг 300 нафардан ортиқ ходим малака оширди.

Жорий ўқув йилидан бошлаб, “Прокурорлик фаолияти” йўналишида иккинчи олий таълим ҳамда магистратуранинг “Прокурорлик фаолияти” мутахассислигида кечки таълим шакли йўлга қўйилди.

Шундан сўнг Ҳуқуқни муҳофаза қилиш академияси бошлиғининг биринчи ўринбосари Евгений Вячеславович Коленко сўзга чиқди ва Академия жамоасини, барча устозлар ва фахрийларни байрам билан самимий табриклаб, энг илғор тажриба ва амалиётга асосланган таълим жараёнларини ташкил этиш, ўз зиммасига юклатилган касбий вазифаларини аъло даражада бажаришга қодир салоҳиятли кадрларни тайёрлашда Академия жамоасига фидойилик ва омад тилади.

Бош прокуратура ва Академия раҳбарияти томонидан раҳбатлантирилган бир гуруҳ ходимларни тақдирлаш маросими байрам тадбирига бошқача шукуҳ бағишлади.

Тадбир давомида Академия талабалари устозларни бадиий чиқишлар давомида табрикладилар.