Академияда прокуратура органлари ходимлари иштирокида “Тилга эътибор – элга эътибор” танлови ўтказилди

Ҳуқуқни муҳофаза қилиш академиясида прокуратура органлари фаолиятида давлат тилидан тўғри ва тўлиқ фойдаланишни таъминлаш, давлат тилининг нуфузини ошириш, ходимларнинг нутқ маданиятини юксалтириш ва давлат тилида иш юритишга оид амалий кўникмаларни ривожлантириш мақсадида “Тилга эътибор – элга эътибор” деб номланган танлов ўтказилди.

Танлов уч йўналишда ташкил этилган бўлиб, тизимли таҳлилий иш танлови, саводхонлик танлови ва шеърият танловидан иборат.

Танловнинг ҳудудий саралаш босқичида 100 нафардан ортиқ ходим иштирок этган бўлиб, биринчи ўринни эгаллаган ғолиблар якуний босқичга йўлланма олдилар.

Якуний босқич натижаларига кўра, барча йўналишлар бўйича 1-, 2-, ва 3-ўрин ғолиблари пул мукофотлари ҳамда дипломлар билан тақдирланди. 

Танлов комиссиялари таркибига ҳудудий босқичларда ва якуний босқичда филологлар, ёзувчилар, шоирлар ва адабиётшунослар киритилган.

Тизимли таҳлилий иш танловининг биринчи босқичида биринчи ўринни эгаллаган барча муаллифлар якуний босқичда оғзаки суҳбатдан ўтдилар. Бу босқичда таҳлилий ишларда давлат тили тўғрисидаги қонун ҳужжатларига риоя қилиниши, жамоатчилик назоратининг самарали усуллари, давлат тилининг амал қилиши билан боғлиқ муаммоларни ҳал этиш йўллари ва давлат тилининг нуфузини оширишга қаратилган таклифлар каби муҳим жиҳатлар таҳлил қилинди.

Оғзаки суҳбатлар натижасида тизимли таҳлилий иш танлови бўйича 1-, 2- ва 3-ўрин ғолиблари, шунингдек, "Энг зўр тизимли таҳлил" ва "Анъанавий вазият ва ноанъанавий ечим", “ Энг яхши процессуал хужжат” номинациялари соҳиблари аниқланди.

Саводхонлик танловида биринчи босқичда ўзбек адабий тили меъёрлари ва лотин алифбоси доирасидаги тест саволларини ечиш натижасида ғолиблар аниқланди. Якуний босқичда эса иштирокчилар долзарб мавзулар ва мумтоз адабиёт асосида иншо ёздилар, ва натижада 1-, 2- ва 3-ўрин ғолиблари, шунингдек, "Энг чиройли ҳуснихат" номинацияси соҳиби аниқланди.

Шеърият танловида биринчи босқичда иштирокчилар “Ватан”, “Ўзбек тили” ва “Касб” мавзулари бўйича танлаган шеърий матнларни тақдим этдилар. Якуний босқичда эса иштирокчилар Ҳайъат томонидан тақдим этилган шеърий матнларни ўқиб эшиттирдилар, уларни таҳлил қилдилар. Натижада шеърият танлови бўйича 1-, 2- ва 3-ўрин ғолиблари, шунингдек, "Энг жозибали шеърий ифода" номинацияси соҳиби аниқланди.