Профессор-ўқитувчиларнинг педагогик маҳоратини ошириш бўйича навбатдаги семинар-тренинг

Ҳуқуқни муҳофаза қилиш академиясида профессор-ўқитувчиларнинг педагогик маҳоратини ошириш, таълим жараёнига инновацион технологиялар ва методикаларни жорий этиш мақсадида изчил ва тизимли ишлар олиб борилмоқда.

Мазкур фаолият доирасида Академияда Ўзбекистон Республикаси Олий таълим, фан ва инновациялар вазирлиги ҳузуридаги Профессионал таълимни ривожлантириш институтининг “Таълимда бошқарув” кафедраси профессори, п.ф.д. Д.Рахматуллаева ҳамда мазкур институтнинг “Персонални бошқариш” кафедраси мудири, п.ф.ф.д. Н.Розиқова иштирокида “Андрагогика ва катталар аудиториясида интерактив методлардан фойдаланиш” мавзусида навбатдаги семинар-тренинг ташкил этилди.

Семинар-тренингда андрагогика тушунчаси, андрагогика фанининг мақсад вазифалари, тамойиллари, катталар таълимининг ўзига хос хусусиятлари, катталар таълимида қўлланиладиган интерактив методлар ва уларнинг турлари, мазмун-моҳияти ҳамда қўллаш методикаси ҳақида батафсил маъруза қилинди. Тренинг давомида қатнашчиларнинг фаол иштирокида интерактив методларни қўллаш юзасидан амалий машқлар бажарилди.

Семинар-тренинг сўнгида мавзу юзасидан иштирокчиларни қизиқтирган саволларга батафсил жавоб берилди.