БМТ Коррупцияга қарши конвенциясининг конференцияси модели ташкил этилди

Ҳуқуқни муҳофаза қилиш академияси ташкил топганлигининг икки йиллиги муносабати билан ташкил этилган халқаро илмий-амалий конференция тадбирлари доирасида Академияда “БМТнинг Коррупцияга қарши конвенцияси иштирокчи-давлатлари конференцияси модели: иккинчи босқични амалга ошириш обзори” ўтказилди.

Ҳар йили анъанавий тарзда ўтказиладиган мазкур тадбир Академиянинг Халқаро коррупцияга қарши курашиш куни муносабати билан ташкил этилган тадбирлар туркумига киради.

Тадбир Коррупцияга қарши курашиш агентлиги, БМТнинг Гиёҳванд моддалар ва жиноятчилик бўйича бошқармаси, “Минтақавий мулоқот” ХННТ, Германия халқаро ҳамкорлик жамияти (GIZ) билан ҳамкорликда ташкил этилди.

Тадбирда Қорақалпоқ давлат университети, Тошкент шаҳридаги Халқаро Вестминстер университети, Жаҳон иқтисодиёти ва дипломатия университети, Самарқанд давлат университети, Тошкент давлат юридик университети, Судьялар олий кенгаши ҳузуридаги Судьялар олий мактаби, Ўзбекистон Миллий университети, Термиз давлат университети, Наманган давлат университети ва Ҳуқуқни муҳофаза қилиш академиясидан бакалавриат талабалари иштирок этдилар.

Иштирокчилар икки босқичдан иборат бўлган БМТ Модели конференциясида БМТнинг Коррупцияга қарши конвенцияси иштирокчи-давлатлари делегатлари сифатида ролли ўйинларда ўз билимларини намоён қилишди. 

Хусусан, биринчи босқичда иштирокчилар Бразилия, Малайзия, Испания, Латвия, Буюк Британия, Канада, Қозоғистон, Чехия, Япония ва Ўзбекистон давлатларининг шартли делегатлари сифатида БМТ Конвенциясининг 12-моддаси қоидаларнинг ўз қонунчилигида қўлланилиши бўйича ҳисобот беришди. 

Конвенция 12-моддасига мувофиқ, ҳар бир давлат хусусий сектор соҳасида ҳалоллик стандартларини жорий қилишга кўмаклашиш, уларнинг ҳуқуқни муҳофаза қилиш органлари билан ҳамкорлигини таъминлаш, давлат органлари билан муносабатга киришганда коррупцияга ва манфаатлар тўқнашувига йўл қўймаслик каби масалаларни қамраб олган.

Тадбирнинг иккинчи қисмида таълим муассасалари жамоалари ўзлари ҳимоя қилган хорижий давлатнинг тажрибаси асосида Ўзбекистонда хусусий секторнинг коррупцияга қарши курашиш соҳасидаги фаоллигини оширишни таъминлашга қаратилган таклифлар орқали миллий қонунчиликни такомиллаштириш бўйича чиқишларни амалга оширишди. 

Шартли делегатларнинг ҳисоботлари ва таклифлари Коррупцияга қарши курашиш агентлиги, БМТнинг Гиёҳванд моддалар ва жиноятчилик бўйича бошқармаси, “Минтақавий мулоқот” ХННТ, CERT International (Slovakia) ташкилотларининг коррупцияга қарши курашиш ва унинг олдини олиш соҳасидаги экспертлар томонидан баҳолаб борилди. 

Мазкур тадбир олий таълим муассасаларининг талабалари ва тингловчиларига БМТнинг Коррупцияга қарши конвенцияси ва илғор хорижий давлатларда хусусий секторда коррупцияга қарши курашиш масалаларини чуқур ўрганишга ва бу борадаги билим ва кўникмаларини оширишга ёрдам берди.