Коррупцияга қарши курашиш соҳасида ёшлар салоҳиятини ошириш бўйича тренинг ташкил этилди

Халқаро коррупцияга қарши кураш куни доирасида Ҳуқуқни муҳофаза қилиш академиясида “Ёшларни жамоатчилик назорати, шаффофлик ва коррупцияга қарши курашиш масалаларига жалб қилиш” мавзусидаги семинар-тренинги ўтказилди.

Тадбир Ҳуқуқни муҳофаза қилиш академияси томонидан Коррупцияга қарши курашиш агентлиги билан ҳамкорликда, Европа Иттифоқи, Германия халқаро ҳамкорлик жамияти (GIZ) ва БМТнинг Гиёҳвандлик ва жиноятчилик бўйича бошқармаси кўмагида ташкил этилди.

Тадбирда Тошкент шаҳридаги Халқаро Вестминстер университети, Жаҳон иқтисодиёти ва дипломатия университети, Тошкент давлат юридик университети, Амити университети, Вебстер университети, Инҳа университети, Альфраганус университети, Ўзбекистон Миллий университети ва Ҳуқуқни муҳофаза қилиш академияси талабалари иштирок этдилар.

Тренинг БМТнинг Гиёҳвандлик ва жиноятчилик бўйича бошқармаси дастури миллий координатори Азат Ирманов ва Transparency International Латвия директори Инесе Тауриня томонидан олиб борилди.

Тадбир дастуридан экспертлар чиқишлари, гуруҳларда ишлаш ҳамда жамоатчилик назоратини амалга ошириш ва коррупцияга қарши курашиш борасидаги ташаббуслар бўйича тажриба алмашиш ўрин олди.

Талабалар БМТнинг Коррупцияга қарши конвенцияси қоидалари, ГРЕЙС коррупция платформаси, фуқаролик мониторинги моделлари ҳамда очиқ маълумотлар ва ахборотлардан ҳуқуқбузарликларни аниқлаш ва бошқарувни яхшилаш мақсадида фойдаланиш ҳақидаги маълумотлар билан танишиб чиқдилар.

Шунингдек, тадбир давомида Ҳуқуқни муҳофаза қилиш академияси талабалари ўртасида ташкил этилган “Ёшлар коррупцияга қарши ташаббуслари” танлови ғолибларини тақдирлаш маросими ўтказилди. Талабаларнинг лойиҳалари коррупцияга қарши кураш соҳасида ижодий ёндашувни ривожлантириш, инновацион ечимларни излашни рағбатлантириш ҳамда лойиҳаларни бошқариш кўникмаларини мустаҳкамлашга қаратилган.

Тадбир ёшларнинг жамоатчилик назоратини амалга ошириш, очиқ манбалар ва платформалар билан ишлаш бўйича билим ва кўникмаларини ошириш имконини берди.