Академия сунъий интеллект соҳасида мутахассис вазифасига танлов эълон қилади (шартнома асосида вақтинчалик иш)

Ўзбекистон Республикаси Ҳуқуқни муҳофаза қилиш академияси Ўзбекистон Республикаси Президентининг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сон Фармонига мувофиқ ташкил этилган.

Академия фаолиятининг асосий йўналишлари сифатида:

таълим олувчиларда инсон ҳуқуқ ва эркинликларига сўзсиз риоя қилиш маданияти билан уйғунлашган юксак маънавий, психологик, таҳлилий ва касбий сифатларни ривожлантиришнинг самарали тизимини жорий этган ҳолда жиноятларни тергов қилиш соҳасида мутахассисларни чуқурлаштирилган мақсадли базавий тайёрлаш;

махсус касбий кўникмаларни шакллантириш ва ривожлантириш, суд-ҳуқуқ соҳасидаги ислоҳотларнинг мазмун-моҳиятини етказишга қаратилган дастурлар асосида тергов ҳамда ҳуқуқни муҳофаза қилиш фаолиятининг бошқа соҳаларида кадрларни тайёрлаш, қайта тайёрлаш ва уларнинг малакасини ошириш;

коррупцияга ҳамда жиноий даромадларни легаллаштиришга қарши курашиш соҳаларида махсус ўқув дастурлари асосида давлат органлари ва бошқа ташкилотлар ходимларининг малакасини ошириш ва қайта тайёрлаш тизимини йўлга қўйиш;

жиноятларни тергов қилиш методикаси ва тактикасини самарали белгилаш асосида жиноят ишлари бўйича мустақил иш юритиш кўникмаларини ривожлантиришга қаратилган интерфаол ўқитиш методларини таълим жараёнига татбиқ этиш ва бошқалар белгиланган.

Ҳозирги вақтда Академия фаолиятига вақтинчалик асосда сунъий интеллект соҳасидаги мутахассисни жалб қилиш зарурати мавжуд. Мутахассис томонидан тақдим этилган ҳужжатлар маъқулланган тақдирда, у билан Академия ўртасида икки томонлама фуқаролик ҳуқуқий шартнома имзоланади.

Сунъий интеллект соҳасидаги мутахассис қуйидаги вазифаларни бажариши лозим:

Академия раҳбариятининг топшириғи бўйича Академияда сунъий интеллект лойиҳаларини ишлаб чиқиш ва амалга ошириш, Академия ходимлари ва таълим олувчиларда сунъий интеллект билан ишлаш кўникмаларини шакллантириш бўйича шартномага илова қилинган бажариладиган ишлар календарь-режасига мувофиқ, қуйидаги хизматларни (кейинги ўринларда – “хизматлар”) кўрсатиш;

– Академияда сунъий интеллектдан фойдаланиш қамровини кенгайтириш бўйича концепция лойиҳасини ишлаб чиқиш, улар бўйича таклифларни Академиянинг тегишли таркибий тузилмалари билан муҳокама қилиш ва маъқуллаш учун Академия раҳбариятига киритиш;

– Академия ходимларининг сунъий интеллектдан фойдаланиш кўникмаларини шакллантириш ва ривожлантириш бўйича қисқа муддатли тренинглар ташкил қилиш;

– Академиянинг Тезкор-қидирув фаолияти ва киберҳуқуқ кафедраси мисолида таълим, илмий-тадқиқот ва таҳлилий фаолият йўналишда сунъий интеллект имкониятларини жорий қилишни ташкил қилиш;

– Академияда сунъий интеллектдан фойдаланиш бўйича ўқув, ўқув-услубий ва илмий методик қўлланмалар, ўқув жараёнига оид тақдимотлар тайёрлаш;

– Академияда сунъий интеллектдан фойдаланиш қамровини кенгайтириш бўйича лойиҳаларини тайёрлаш, сунъий интеллект соҳасида миллий ва хорижий муассасалар ва экспертлар билан ҳамкорликни ташкил қилиш бўйича ишларни йўлга қўйиш.

Номзодга қўйиладиган талаблар:

Сунъий интеллект соҳасида тегишли ҳужжат (сертификат);

Сунъий интеллект соҳасида камида икки йиллик иш тажрибаси;

Ўзбек, инглиз, рус тилларини яхши билиш.

Мазкур иш муддати 2 (икки) ойга белгиланган бўлиб, келгусида заруратга кўра, фуқаро меҳнат шартномаси асосида Академияга ишга қабул қилиниши мумкин.

Бажарилган иш учун тўлов миқдори тарафлар келишуви билан белгиланади ва талабгорга бажарилган иш натижасига кўра тўланади.

Талаблар: ташаббускорлик, жамоа билан ҳамнафас ишлаш, берилган топшириқларни ўз вақтида бажариш,

Иш вақти: Иш вақти 40 соатлик, ҳафтасига 5 кунлик иш режимини ташкил этади.

Талабгор Академия Кадрлар бўлимига фуқаролик паспорти ёки ID картаси билан шахсан мурожаат қилиб, тегишли ҳужжатлар (шахсини тасдиқловчи ҳужжат, объективка, олий таълим олганлик ҳақида диплом ва унинг иловаси, меҳнат дафтарчаси нусхаси, СТИР маълумотномасини тақдим этиши лозим. Тақдим этилган ҳужжатлар ўрганиб чиқилганидан сўнг заруратга кўра талабгор билан комиссия таркибида суҳбат ўтказилади.

Ҳужжатларни топшириш муддати 2025 йил 1 февралга қадар.

тел: 71 202-04-96 (1913)