“Давлат органларининг коррупцияга қарши курашиш бўйича идоравий чора-тадбирларининг самарадорлигини ошириш” мавзусида халқаро семинар ўтказилди

Коррупцияга қарши курашиш бўйича 2017-2018 йилларга мўлжалланган давлат дастурини амалга ошириш мақсадида Коррупцияга қарши курашиш бўйича республика идоралараро комиссияси ва Бош прокуратура Академияси томонидан ЕХҲТнинг Лойиҳалар координатори ва “Региональный диалог” ХНТнинг кўмагида 2018 йилнинг 14-15 ноябрь кунлари “Давлат органларининг коррупцияга қарши курашиш бўйича идоравий чора-тадбирларининг самарадорлигини ошириш” мавзусида халқаро семинар ўтказилди.

Тадбирда 150 нафардан ортиқ шахслар - Идоралараро комиссия аъзолари, давлат органларининг раҳбарлари ва Халқ таълим, Олий ва ўрта махсус таълим, Соғлиқни сақлаш, Бандлик ва меҳнат муносабатлари, Молия, Иқтисодиёт, Адлия, Ички ишлар вазирликлари, ДБҚ, ДСҚ ва бошқа давлат органларининг идоравий мувофиқлаштирувчилари, Бош прокуратура ходимлари, Академияси тингловчилари, сиёсий партиялар, фуқаролик жамияти ва оммавий ахборот воситалари вакиллари иштирок этишди.

Тадбирнинг мақсади - коррупцияга қарши курашиш бўйича халқаро стандартлар ва ижобий илғор тажрибаларни жорий қилиш орқали идоравий коррупцияга қарши чора-тадбирлар самарадорлигини тубдан ошириш.

Экспертлар томонидан Ўзбекистонда 2017-2018 йиллар давомида коррупцияни тизимли олдини олиш бўйича муҳим ислоҳотлар амалга оширилганлиги, ҳар бир идора томонидан коррупцияга қарши курашиш бўйича ҳуқуқий ва институционал база сезиларли такомиллаштирилганлиги, давлат органларининг шаффофлиги ва очиқлигини таъминланганлиги, ахборот очиқлиги ва халқаро ҳамкорликни мустаҳкамлаш бўйича муҳим ишлар амалга оширилганлиги қайд этилди.

ЕХҲТ ва Европа Кенгашининг коррупцияни олдини олиш бўйича халқаро эксперти Ярослав Стрельченок (Латвиянинг Коррупцияга қарши бюросининг истеъфодаги раҳбари) иштирокчиларга давлат идораларида коррупцияга қарши курашиш бўйича чора-тадбирларни жорий қилишнинг муҳимлиги ҳақида, шу жумладан ички назорат тизимини, коррупцияга ҳолатлари ҳақидаги маълумотларни қабул қилиш ва ҳал қилиш механизмларини жорий этиш, давлат органларида коррупция хавф-хатарларини баҳолаш ҳақида маълумот берди ҳамда мазкур соҳадаги халқаро амалиётни тақдим этди.

“Региональный диалог” ХНТ эксперти Горан Клеменчич (Словениянинг истеъфодаги адлия вазири) давлат органлари ходимлари томонидан активлар ва манфаатлар тўқнашувини электрон декларациялашни жорий қилиш амалиётининг самарадорлиги, молиявий айланмаларнинг шаффофлигини таъминлаш ҳақидаги маълумотларни тақдим этди ҳамда мазкур соҳадаги словения тажрибасини онлайн тартибда намойиш қилди.

Тақдимотлар барча иштирокчиларда катта қизиқиш уйғотди. Тадбирда давлат органлари, фуқаролик жамияти институтлари вакиллари ва бошқа иштирокчилар коррупцияга қарши курашиш соҳасидаги чора-тадбирларни амалга ошириш бўйича жаҳон тажрибаси ва илғор амалиёти билан танишиш имконини берди.