Тергов судьялари институти – шахс ҳуқуқ ва эркинликларини ҳимоя қилишнинг янги кафолати

Давлатимиз раҳбарининг тегишли Фармонига асосан жорий йилнинг январь ойидан бошлаб тергов судьяси институти ўз фаолиятини бошлади. Суд тизимида янги тузилманинг иш бошлаши биринчи навбатда фуқароларнинг қонуний манфаатларини ҳимоя қилиш ва одил судловни амалга оширишда янги қадам бўлди.

Эндиликда, тергов судьяларига судга қадар иш юритиш босқичида процессуал қарорларга санкция бериш ва мажбурлов чораларини қўллаш билан боғлиқ ишларни кўриб чиқишда шахснинг ҳуқуқ ва эркинликларига риоя этилиши устидан суд назоратини амалга ошириш билан бир қаторда, маъмурий ҳуқуқбузарликка оид ишларни ҳам кўриб чиқиш ваколати берилди.

Мазкур институт фаолиятини самарали ташкил этиш масалаларини жорий этиш, унинг мазмун моҳиятини атрофлича кўриб чиқиш мақсадида Ҳуқуқни муҳофаза қилиш академиясида “Тергов судьялари институти – шахс ҳуқуқ ва эркинликларини ҳимоя қилишнинг янги кафолати” мавзусида республика семинар-тренинг бўлиб ўтди.

Унда суд-ҳуқуқ тизими вакиллари, адвокатлар, юридик олий ўқув юртлари профессор-ўқитувчилари ва жамоатчилик вакиллари, шунингдек яқинда фаолиятини бошлаган жиноят ишлари бўйича туман (шаҳар) судининг тергов судьялари онлайн тарзда иштирок этишди.

Мазкур тадбирда тергов судьялари томонидан кўриб чиқилган ишлар таҳлил қилиниб, ушбу институтнинг афзалликлари, судга қадар иш юритиш босқичида суриштирув ва тергов органлари устидан суд назоратини ошириш, миллий қонунчиликни такомиллаштириш ҳамда суд амалиёти билан боғлиқ бошқа масалалар ҳам муҳокама қилинди ва ўзаро фикрлар алмашилди.

Иштирокчилар бу каби тадбирларни ташкил қилиш нафақат судьялар ёки ҳуқуқ соҳасини мутахассислари учун, балки жамиятимиз аъзолари учун муҳимлигини таъкидлаб, суд тизимининг шаффофлиги, холислиги ва самарадорлигини ошириш, фуқароларнинг ҳуқуқий онгини кучайтиришга хизмат қилишини билдириб ўтишди.