Илм-фанни ривожлантиришда тўсиқ бўлаётган субъектив ва объектив омиллар муҳокама қилинди

Ўзбекистон Республикаси Ҳуқуқни муҳофаза қилиш академиясида анъанавий тарзда ўтказиб келинаётган Фан соати доирасида Ўзбекистон Республикасида хизмат кўрсатган юрист, ОАК юридик фанлар бўйича эксперт кенгаш раиси, ю.ф.д., профессор З.Эсанова томонидан “Илм-фанни ривожлантиришда тўсиқ бўлаётган субъектив ва объектив омиллар” мавзусида маҳорат дарси ўтказилди.

Ушбу тадбирда Ўзбекистон Республикаси Бош прокуратураси, Ҳуқуқни муҳофаза қилиш академияси, Инсон ҳуқуқлари бўйича Миллий марказ Фанлар академияси Давлат ва ҳуқуқ институти, Тошкент давлат юридик университети, Жамоат хавфсизлиги университети ходимлари, докторант, мустақил изланувчилар ва бошқа илмий жамоатчилик вакиллари қатнашишди.

Тадбир давомида эксперт томонидан бугунги кунда илм-фанни ривожлантиришда тўсиқ бўлаётган субъектив ва объектив омиллар санаб ўтилди.

Хусусан, диссертация тузилишига оид муаммолар, плагиат натижаларини баҳолашга оид муаммолар, туташ ихтисосликларни янада соддалаштириш, тармоқлараро тадқиқотларни кўпайтириш, тадқиқот натижаларини эълон қилишга доир муаммолар, илмий янгиликларни синовдан ўтказиш жараёни билан боғлиқ муаммолар, оппонентлик тақризларини олиш ва баҳолаш билан боғлиқ талаблар ва замонавий ихтисосликларни жорий этиш каби масалалар муҳокама қилиниб, уларни бартараф қилиш бўйича иштирокчилар томонидан асослантирилган таклифлар билдирилди.

Шунингдек, тадбир давомида эксперт томонидан илмий изланиш олиб бораётган тадқиқотчиларга муваффақиятли ҳимоя учун тегишли тавсия ва кўрсатмалар берилди.

Иштирокчилар ўзларини қизиқтирган саволларига жавоблар олишди.