Коррупцияга қарши курашиш виртуал академияси фаолияти йўлга қўйилди

Жорий йилнинг 28 февраль куни Ҳуқуқни муҳофаза қилиш академиясида Коррупцияга қарши курашиш агентлиги билан биргаликда коррупцияга қарши курашиш виртуал академияси тизими жорий этиш ҳолати таҳлил қилинди.

Ўзбекистон Республикаси Президентининг 2024 йил 21 июндаги “Аҳоли ва давлат хизматчиларининг коррупцияга қарши курашиш соҳасидаги билимларини узлуксиз ошириш тизимини жорий қилиш чора-тадбирлари тўғрисида”ги ПҚ-228-сон қарори билан жорий йилнинг январь ойидан “Коррупцияга қарши курашиш виртуал академияси” электрон платформаси жорий этилиши белгиланган.

Учрашувда Академия бошлиғининг биринчи ўринбосари Е.Коленко томонидан Виртуал академия электрон платформасини жорий этиш ҳолати, унинг имкониятлари, ҳозирда амалга оширилаётган ишлар ва истиқболдаги лойиҳалар бўйича батафсил маълумот берилди.

Хусусан, Академия томонидан ўтган 2024 йил мобайнида 150 дан ортиқ давлат органлари ва бошқа ташкилотларнинг 95 623 нафар ходимлари учун 110 та масофавий шаклдаги ўқув курслари ташкил этилиб, курсларни ижобий якунлаган тингловчилардан электрон сертификатлар тақдим этилди.

Жорий йилнинг январь ойида эса Виртуал академияси электрон платформасида ташкилотларнинг коррупцияга қарши курашишга масъул бўлган (комплаенс-назорат) 700 нафардан ортиқ ходимларнинг малакаси оширилди.

Агентлик билан Академия томонидан тасдиқланган режа-графикка мувофиқ, давлат органлари ва ташкилотларига ишга янги қабул қилинган ходимлар, коррупцияга қарши ички назорат тузилмалари ва коррупциявий хавф-хатарлар юқори бўлган давлат хизмати лавозимларида фаолият кўрсатувчи ходимлар учун март ойидан бошлаб махсус ва махсус чуқурлаштирилган курслар бошланади.

Учрашув давомида Агентлик директори А.Бурханов Виртуал академия платформаси имкониятлари билан танишиб, ўз таклиф ва тавсияларини берди.

Учрашувда томонлар Виртуал академиянинг имкониятларидан янада кенг фойдаланиш, ёшлар ва аҳолининг барча қатламларини жалб қилиш орқали уларнинг ҳуқуқий онги ва ҳуқуқий маданиятини юксалтириш, жамиятда коррупцияга нисбатан ҳуқуқий иммунитетни шакллантириш, ёш авлод онгига ҳалоллик қадриятларини сингдириш бўйича саъй-ҳаракатларни кучайтиришга келишиб олди.