Халқаро терроризмга қарши кураш бўйича прокуратура органлари ходимларининг билим ва кўникмалари оширилди

Ўзбекистон Республикаси Ҳуқуқни муҳофаза қилиш академиясида, Ўзбекистондаги Буюк Британия ва Шимолий Ирландия элчихонаси билан ҳамкорликда терроризмга қарши кураш масалаларига бағишланган махсус тренингнинг биринчи ҳафталиги ўтказилди. Ушбу тадбирда жиноят ҳуқуқи ва терроризмга қарши кураш соҳасида катта амалий тажрибага эга бўлган Британиялик эксперт, жиноят ишлари бўйича маслаҳатчи М.Кэрролл иштирок этди.

Тренингнинг мақсади – прокуратура органлари ходимларининг терроризмга қарши кураш соҳасидаги билим ва профессионал кўникмаларини ошириш, хорижий давлатларнинг ушбу соҳадаги ижобий тажрибасини, шунингдек террористик ҳаракатларни аниқлаш, тергов қилиш ва унга қарши курашиш бўйича қўлланиладиган халқаро ҳуқуқий механизмлар ва стандартларни ўрганиш ҳисобланади.

Тадбир давомида иштирокчилар халқаро ҳамкорлик воситаларини ҳуқуқий тартибга солиш ва уларни амалда қўллаш, ўзаро ҳуқуқий ёрдам, экстрадиция ва давлатлар ўртасида оператив маълумот алмашиш, замонавий усуллар орқали, хусусан, очиқ маълумотлар манбаларидан далилларни йиғиш, таҳлил қилиш ва фойдаланиш масалаларини муҳокама қилишди.

Тренингда шунингдек терроризмга қарши курашишда идоралараро ҳамда миллий ва халқаро тузилмалар, жумладан, ҳуқуқни муҳофаза қилиш органлари, махсус хизматлар, тегишли ташкилотлар ўртасида мазкур турдаги жиноятларга қарши курашишда самарали ҳамкорлик масалаларига алоҳида эътибор қаратилди.

Тадбирнинг муҳим қисми сифатида иштирокчилар томонидан амалиётдаги реал кейсларни актив муҳокама қилиш, прокуратура органлари ходимларининг терроризм билан боғлиқ жиноятларни тергов қилишда дуч келадиган мавжуд муаммоларни аниқлаш ҳамда уларни хорижий тажрибага таянган ҳолда бартараф қилиш бўйича ҳамкорликда таклифларни ишлаб чиқиш жараёни бўлди.

Тренинг иштирокчилар томонидан юқори баҳоланиб, ушбу курснинг кейинги босқичларини давом эттиришга асос бўлди.