Прокуратура органлари ходимлари учун ЮНЕСКО минтақавий тренинглари ўтказилди

Ҳуқуқни муҳофаза қилиш академияси ЮНЕСКОнинг Ўзбекистондаги ваколатхонаси ва Швейцариянинг Ўзбекистондаги элчихонаси билан ҳамкорликда Самарқанд, Навоий ва Бухоро вилояти прокуратура органлари ходимлари учун “Сўз ва ифода эркинлиги ҳамда журналистлар хавфсизлигини таъминлаш” мавзусида тренинглар ташкил қилди.

Тренингда мазкур вилоятлар прокурорларининг жамоатчилик билан ишлаш ва ҳуқуқий ахборот бўйича ёрдамчилари, терговчилар, шунингдек, ИИВ, прокуратура органларида, ижтимоий ва иқтисодий соҳаларда қонунчилик ижроси устидан назорат бўлимлари прокурорлари иштирок этдилар.

ЮНЕСКО ваколатхонаси томонидан лойиҳа доирасида жалб этилган халқаро эксперт – Канаданинг Квебек провинцияси собиқ бош прокурори Сабин Оулле, тадбир иштирокчиларига сўз ва ифода эркинлигини ҳимоя қилишнинг халқаро меъёрлари ва тамойиллари мазмун-моҳияти, шунингдек, прокуратура органлари ходимларининг жиноят ишлари тергови ва суд процесслари жараёнида оммавий ахборот воситалари вакиллари ҳуқуқ ва қонуний манфаатларини муҳофаза қилишдаги роли ҳақида батафсил тушунтириш берди.

Тренинг якунида иштирокчиларга халқаро андозадаги сертификатлар топширилди.