Академия талабалари ва тингловчилари рейтингини шакллантирувчи электрон платформа жорий қилинди

Ҳуқуқни муҳофаза қилиш академиясида барча фаолият соҳаларини, шу жумладан таълим жараёни: дарс жадвалларини шакллантириш, имтиҳонлар ўтказиш, таълим олувчиларни баҳолаш ва уларнинг рейтингини шакллантиришни рақамлаштириш бўйича изчил ишлар олиб борилмоқда.

Ушбу фаолият доирасида Академияда талабалар ва тингловчиларнинг рейтингини комплекс баҳолашга оид уникал инновацион электрон платформа жорий этилди. Мамлакатимизда аналоглари мавжуд бўлмаган ушбу платформа таълим жараёни, ёшлар билим ва кўникмаларини яхшилаш, уларнинг мотивациясини кучайтириш ва Академия олдига қўйилган вазифаларнинг тўлақонли ижросини таъминлашга қаратилган.

Электрон платформа талабалар ва тингловчиларни 11 та мезон асосида баҳолайди ва нафақат ўқув фанларини ўзлаштириш даражаси, балки илмий тадқиқот фаолияти, чет тилларини билиш даражаси, спорт ва маънавий-маърифий тадбирларда иштирок этиш, шунингдек, тўгараклар, медиалойиҳалар ва бошқа тадбирларда иштирок этиш, рағбатлантириш ва интизомий жазолар кўрсаткичлари, ҳуқуқни муҳофаза қилиш органларида стажировка ўтиш каби мезонларни қамраб олади.

Янги платформанинг асосий хусусияти таълим фаолияти ҳамда тергов, суриштирув ва прокуратура органларининг кадр эҳтиёжларига кўра мезонларни ўзгартириш имкониятидир.

Бундан ташқари, платформа талабалар ва тингловчиларнинг Академияга қабул қилинишидан бошлаб, кейинчалик бутун хизмат фаолиятини қамраб оладиган “Портфолио”сини шакллантиради.

Рейтинг натижалари шаффоф бўлиб, уларни талабалар ва тингловчилар, шунингдек, хоҳишига кўра уларнинг ота-оналари доимий равишда кўриб боришлари мумкин. Юқори натижаларни кўрсатган таълим олувчиларни моддий ва номоддий рағбатлантириш назарда тутилади.

Ушбу платформанинг жорий қилиниши ҳуқуқни муҳофаза қилиш органларининг бўлажак кадрларининг профессионал компетенцияларини шакллантиришда муҳим роль ўйнайди ва мамлакатимизнинг ҳуқуқни муҳофаза қилиш тизими учун муносиб мутахассислар тайёрлашга ҳисса қўшади.