Ўзбекистон Республикаси
Ҳуқуқни муҳофаза қилиш академияси
Ўзбекистон Республикаси Ҳуқуқни муҳофаза қилиш академиясида "Вояга етмаганлар жиноятчилиги бўйича муқобил таъсир чораларини қўллаш ҳамда жиноий одил судловни таъминлаш (ювенал юстиция)" мавзусида семинар бўлиб ўтди.
Тадбир Ўзбекистон Республикаси Бош прокуратураси ва ЮНИСЕФнинг Ўзбекистондаги ваколатхонаси билан ҳамкорликда, вояга етмаганлар томонидан содир этилган ҳуқуқбузарликларга замонавий ёндашувлар бўйича прокурор-тергов соҳаси кадрларининг хабардорлиги ва касбий кўникмаларини ошириш мақсадида ташкил этилган.
Семинарда Бош прокуратура, Академия, ИИВ Тергов департаменти, шунингдек, онлайн шаклда туман ва шаҳар прокуратуралари терговчилари ва бошқа ходимлари иштирок этдилар.
Тадбирда ЮНИСЕФнинг Ўзбекистондаги ваколатхонаси раҳбарининг ўринбосари Джоффри Ижумба сўзга чиқиб, вояга етмаганлар жиноятчилиги бўйича муқобил таъсир чораларини қўллашга қаратилган тиклаш амалиёти ва чораларини қўллашнинг самарадорлиги ва аҳамиятини, шунингдек, болалар ҳуқуқлари соҳасидаги халқаро стандартларга мувофиқлигини таъкидлади.
Семинарнинг доирасида халқаро мутахассис, БМТнинг Болалар ҳуқуқлари бўйича қўмитасининг собиқ раиси Ренате Винтернинг маъруза қилиб, ювенал юстиция соҳасидаги халқаро тажриба ва стандартлар билан ўртоқлашди.
Якуний сессия "савол-жавоб" форматида ўтказилиб, иштирокчиларга вояга етмаганлар жиноятчилиги бўйича муқобил таъсир чораларини қўллаш ҳамда жиноий одил судловни таъминлаш масалалари, шу жумладан, қўлланилаётган чораларнинг самарадорлиги ва барқарорлиги ҳамда уларнинг халқаро стандартларга мувофиқлиги бўйича атрофлича фикр алмашиш имконини берди.
