Халқаро давра суҳбати натижалари ҳақида

Жорий йилнинг 26 май куни Ўзбекистон Республикаси Бош прокуратураси Академиясида “Бизнес субъектларининг ҳуқуқлари ва қонуний манфаатларини ҳимоя қилишда халқаро арбитражнинг роли” мавзусида online режимида халқаро давра суҳбати ўтказилди.

Халқаро давра суҳбатида чет эллик экспертлар – Қозоғистондаги “Астана” халқаро молия маркази суди аппаратининг (МФЦА) раҳбари, Британия Қироллиги Арбитрлари институтининг аъзоси, Нью-Йорк штати адвокатлари хайъатининг аъзоси, низоларни самарали ҳал этиш Марказининг аккредитациядан ўтган медиатори Кристофер Кэмпбелл-Холт, Лондонда арбитраж ишлари бўйича адвокатлик амалиёти билан шуғулланаётган “Enyo Law London” адвокати Г.Б.Саитазизова, Ўзбекистон Республикаси Олий судининг судьялари, прокуратура органларининг ходимлари, Бош прокуратура Академиясининг профессор-ўқитувчилари ва магистрантлари, Ўзбекистон Республикаси Адлия вазирлиги, Савдо-саноат палатаси, Ўзбекистон Адвокатлар палатаси, ўқув ҳамда илмий муассасаларнинг вакиллари, илмий ходимлари, мустақил изланувчилар иштирок этдилар.

Тадбирда мамлакатда қонунчиликни янада такомиллаштириш борасидаги ишлар хусусида алоҳида тўхталиб, Ўзбекистонда халқаро арбитраж фаолиятини ривожлантириш, арбитраж фаолиятини тартибга солишга қаратилган қонунчиликнинг ишлаб чиқилиши ва бу йўналишдаги муаммолар билан боғлиқ масалалар муҳокама этилди.

Иштирокчилар диққатига халқаро тижорат арбитражларининг инвесторлар ҳуқуқларини ҳимоя қилишдаги роли, чет давлат арбитражи қарорларини тан олиш ва ижрога қаратиш билан боғлиқ ишларни кўриш бўйича суд амалиёти, инвестор ва давлат ўртасидаги низоларни ҳал этиш механизмлари, халқаро тижорат арбитражларининг замонавий тенденциялари, арбитраж низоларини ҳал этиш институтини ривожлантириш истиқболлари, арбитражларда адвокат иштироки, халқаро тижорат арбитражининг ҳуқуқий асосларини шакллантириш масалалари бўйича маърузалар тақдим этилди.

Ўз навбатида хорижий экспертлар халқаро арбитраж билан боғлиқ халқаро нормалар ва қоидалар хусусида, бир қатор чет эл давлатлари қонунчилиги, арбитраж қарорларининг ижросини таъминлаш хусусиятлари борасида маълумот бериб ўтдилар.

Қозоғистондаги “Астана” халқаро молия маркази суди аппаратининг (МФЦА) раҳбари, Британия Қироллиги Арбитрлари институтининг аъзоси Кристофер Кэмпбелл-Холт ўзининг “Тадбиркорлик субъектларининг ҳуқуқларини ҳимоя қилишда халқаро арбитраж ва судларнинг роли” мавзусидаги маърузасида Қозоғистондаги “Астана” халқаро молия маркази судининг халқаро низоларни ҳал этиш билан боғлиқ фаолияти, халқаро арбитражга мурожаат қилиш, ишларни ҳал қилиш ҳамда арбитраж қарорларини ижрога қаратиш тартиби юзасидан батафсил маълумот бериб ўтди.

Хорижий экспертлар томонидан давра суҳбатида кўтарилган масалаларнинг долзарблиги алоҳида таъкидланиб, мазкур йўналишдаги ҳамкорлик давом эттирилиши юзасидан фикр билдирилди.

Тадбир натижаларига кўра халқаро давра суҳбати ҳужжатлари тўпламини чоп этиш юзасидан тавсия берилди.