Академия халқаро лойиҳа координатори вазифасига танлов эълон қилади (шартнома асосида вақтинчалик иш)

Ўзбекистон Республикаси Ҳуқуқни муҳофаза қилиш академияси Ўзбекистон Республикаси Президентининг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сон Фармонига мувофиқ ташкил этилган.

Академия фаолиятида лойиҳавий бошқарув тизими жорий этилган бўлиб, айни вақтда “Road safety” халқаро лойиҳаcини амалга ошириш доирасида шартнома асосида лойиҳа координатори вазифасига мутахассисни вақтинчалик асосда жалб этиш зарурати мавжуд.

Мутахассис томонидан тақдим этилган ҳужжатлар маъқулланган тақдирда, у билан Академия ўртасида икки томонлама фуқаролик ҳуқуқий шартнома имзоланади.

Лойиҳа координатори қуйидаги вазифаларни бажариши лозим:

Лойиҳа режасини ишлаб чиқиш ва ижросини назорат қилиш;

лойиҳа иштирокчилари ўртасида ўзаро ҳамкорликни ташкил этиш;

лойиҳа ҳужжатлари ва ҳисоботларини юритиш;

муддат, ресурслар ва иш сифати устидан доимий мониторинг олиб бориш;

лойиҳани амалга ошириш жараёнида юзага келган муаммоларни ўз вақтида аниқлаш ва ҳал этиш йўлларини кўриш;

амалга оиширилаётган ишлар юзасидан мунтазам равишда ҳисобот тайёрлаш ва тақдим этиш;

ишчи учрашувлар, йиғилишлар ва онлайн сессияларни ташкил этиш ва ўтказиш;

лойиҳа иштирокчилари ва ҳамкорлари билан самарали алоқа ўрнатиш ва қўллаб-қувватлаш; халқаро стандартлар, молиялаштирувчи ташкилот талаблари ва ҳуқуқий меъёрларга риоя этилишини назорат қилиш;

лойиҳа натижалари бўйича ахборот ва таҳлилий материаллар тайёрлаш;

лойиҳанинг самарадорлигини мониторинг қилиш ва баҳолашда иштирок этиш;

лойиҳа фаолиятини оммага етказиш мақсадида Академия жамоатчилик билан алоқалар бўлими билан келишилган ҳолда тадбирлар (пресс-конференция, тақдимот, ва ҳ.к.) ташкил этиш ва пресс-релиз, ахборот ва интервьюлар тайёрлаш ва Академия жамоатчилик билан алоқалар бўлимига етказиш.

Номзодга қўйиладиган талаблар:

Олий маълумот (халқаро муносабатлар, бошқарув, ҳуқуқ, иқтисодиёт, ижтимоий фанлар ёки тегишли соҳалар бўйича);

Халқаро лойиҳаларда иш тажрибаси (камида 3 йил);

Лойиҳа бошқаруви соҳасида билим ва кўникмалар (лойиҳа режалаштириш, амалга ошириш, мониторинг ва баҳолаш, таҳлил қилиш);

Ўзбек, рус ва инглиз тилини мукаммал билиш (ёзишма ва оғзаки мулоқот даражасида, C1 ёки юқори), бошқа хорижий тиллар билиши афзаллик ҳисобланади;

Ахборот технологияларидан эркин фойдаланиш (MS Office, электрон почта, онлайн платформалар, ҳисобот тайёрлаш, Excel жадваллари);

Кучли ташкилотчилик қобилияти, бир неча вазифаларни бир вақтда мувофиқлаштириш ва жамоавий ишни ташкил этиш кўникмалари;

Ёзма ва оғзаки мулоқот қилиш маҳорати, мантиқий ва аниқ фикр юритиш, ҳисобот ва хизмат мактублари тайёрлашда тажриба;

Масъулиятлилик, ташаббускорлик ва мустақил қарор қабул қилиш қобилияти;

Маданиятлараро мулоқотга тайёрлик ва турли миллат вакиллари билан самарали ҳамкорлик қилиш кўникмаси;

Жамоа билан ишлаш тажрибаси, шахсий ва профессионал интизомга риоя қилиш.

Қўшимча шартлар: Иш муддати – 6 (олти) ой.

Бажарилган иш учун тўлов миқдори тарафлар келишуви асосида белгиланади.

Иш вақти – ҳафтасига 5 кун, кунига 8 соат (40 соатлик иш режим).

Иш жойи – Академия биносида.

Талабгор Академия Кадрлар бўлимига шахсан мурожаат қилиб, тегишли ҳужжатлар (шахсини тасдиқловчи ҳужжат (фуқаролик паспорти ёки ID картаси), объективка, олий таълим олганлик ҳақида диплом ва унинг иловаси, меҳнат дафтарчаси нусхаси, СТИР маълумотномасини тақдим этиши лозим. Тақдим этилган ҳужжатлар ўрганиб чиқилганидан сўнг заруратга кўра талабгор билан комиссия таркибида суҳбат ўтказилади.

Ҳужжатларни топшириш муддати: 2025 йил 23 июлга қадар.

тел: 71 202-04-96 (1774)