Академия талабалар кенгаши раиси (Президенти) сайлови ўтказилиши ҳақида

Ўзбекистон Республикаси Ҳуқуқни муҳофаза қилиш академиясида талабаларнинг маънавий-ахлоқий ва жисмоний баркамоллигини таъминлаш, уларнинг ҳуқуқ ва манфаатларини ҳимоя қилиш, шунингдек, ёшларнинг ижтимоий фаоллигини янада ошириш мақсадида Талабалар Кенгаши раиси (Президенти) сайлови ўтказилиши белгиланган.

Сайлов Академия низомига мувофиқ, 2025 йил октябрь ойининг охирги жума куни соат 09:00 дан 18:00 гача Академия ҳудудида бўлиб ўтади.

Кенгаш раислигига номзодлар Академиянинг Ёшлар билан ишлаш, маънавият ва маърифат бўлими билан келишилган ҳолда тавсия қилинади. Номзодлар 2 кун давомида суҳбатдан ўтказилади ва унда муваффақият қозонган талаба-ёшлар сайловда иштирок этиш ҳуқуқига эга бўладилар. Номзодлардан лидерлик қобилияти, нотиқлик маҳорати, ташаббускорлик ва жамоа билан ишлаш тажрибаси талаб этилади. Шунингдек, улар ёшларга оид давлат сиёсати ва ислоҳотлар мазмун-моҳиятидан хабардор бўлиши шарт.

Сайловолди ташвиқоти учун номзодларга етти кун муддат берилади. Бу давр мобайнида улар ўз дастурлари билан талабаларни таништиради, очиқ мулоқотлар ва дебатларда иштирок этади. Сайлов кунидан бир кун олдин ташвиқот жараёнлари тўхтатилади.

Сайлов умумий, тенг ва ёпиқ овоз бериш йўли билан амалга оширилади. Энг кўп овоз тўплаган номзод Талабалар Кенгаши раиси этиб сайланади ҳамда Академия бошлиғининг буйруғи билан тасдиқланади.

Сайланган раис бир йил давомида ўз фаолиятини олиб боради. У талабалар манфаатларини ифода этиш, ижтимоий ва маънавий-маърифий лойиҳаларни амалга ошириш, иқтидорли ёшларни қўллаб-қувватлаш ва уларнинг ташаббусларини рўёбга чиқариш учун кенг кўламли вазифаларни бажаради.

Сайлов жараёни очиқлик ва ошкоралик тамойиллари асосида ташкил этилади. Академиянинг ижтимоий тармоқлари орқали тайёргарлик жараёни, ташвиқот ишлари ва овоз беришнинг бориши ҳақида доимий равишда ахборот бериб борилади.

Ушбу сайлов Академия талабалари учун ўз иқтидор ва салоҳиятини намойиш этиш, лидерлик ва ташаббускорлик қобилиятини ривожлантириш, шунингдек, талабалар манфаатларини самарали ҳимоя қилиш учун муҳим қадам ҳисобланади.