Ҳуқуқни муҳофаза қилиш академияси ва JICA йўл ҳаракати хавфсизлиги соҳасида ҳамкорликни кенгайтиради

Ўзбекистон Республикаси Ҳуқуқни муҳофаза қилиш академияси Япония халқаро ҳамкорлик агентлиги (JICA) билан ҳамкорликда йўл ҳаракати хавфсизлигини оширишга қаратилган лойиҳани амалга оширмоқда. Лойиҳа Ўзбекистонга йўл ҳаракати хавфсизлиги соҳасида таҳлилий, тадқиқот ҳамда эксперт-маслаҳат ёрдамини кўрсатишни, шу жумладан статистик ҳисобот ва таҳлилларни такомиллаштириш, услубий материаллар ишлаб чиқиш ва аҳолининг ҳуқуқий маданиятини оширишни назарда тутади.

Амалдаги натижалар ва янги қўшма ташаббусларни муҳокама қилиш мақсадида Академия раҳбариятининг Ўзбекистондаги JICA ваколатхонаси раҳбарининг ўринбосари Серо Коки билан учрашуви бўлиб ўтди.

Учрашувда сўнгги икки йил давомида Академияда JICA экспертлари томонидан амалга оширилаётган таҳлилий ва илмий-тадқиқот ишлари изчил давом этаётгани қайд этилди, жумладан:

– йўл ҳаракати хавфсизлиги бўйича статистик маълумотларни тўплаш тизимини такомиллаштириш;

– бошқарув қарорларини қабул қилишга хизмат қиладиган статистик маълумотларни таҳлил қилиш ва амалий қўллаш;

– йўл ҳаракати хавфсизлиги соҳасида аҳолининг ҳуқуқий маданиятини ошириш, шу жумладан ахборот-тарғибот ва реклама материалларини ишлаб чиқиш.

Лойиҳа доирасида Янгийўл шаҳрида ҳамда Тошкент шаҳрининг Юнусобод туманида пилот тадбирлар амалга оширилди. JICA кўмагида авария ўчоқлари аниқланиб, уларни бартараф этиш мақсадида йўл инфратузилмаси объекти реконструкция қилинди ва авария хавфи бартараф этилди, бу эса йўл-транспорт ҳодисалари хавфларини камайтириш ва хавфсиз транспорт муҳитини шакллантиришга хизмат қилади.

Томонлар йўл-транспорт вазиятини таҳлил қилишнинг замонавий ёндашувларини жорий этиш, профилактика чораларини мустаҳкамлаш ҳамда йўл ҳаракати иштирокчиларининг турли гуруҳлари учун манзилли ахборот кампанияларини ривожлантириш бўйича қўшма ишларни давом эттиришга тайёрликларини тасдиқладилар.