Амалиётга йўналтирилган таълим: прокурор текширувини ўқув моделлаштириш

Академияда таълим жараёнини амалиёт билан узвий боғлашга қаратилган тизимли ишлар доирасида жорий йилнинг декабрь ойида ташкил этилган инновацион дарслар ойлиги давомида бакалавриатнинг “Прокурорлик фаолияти” таълим йўналиши талабалари учун прокурор текширувини имитацион форматда моделлаштиришга бағишланган навбатдаги ўқув машғулоти ўтказилди.

Мазкур ўқув машғулоти “Прокурор назорати назарияси ва амалиёти” ўқув модули доирасида “Прокурор текшируви босқичлари ва унинг ўзига хос жиҳатлари” мавзусида ташкил этилди. Унинг асосий мақсади талабаларда прокурор назорати соҳасидаги назарий билимларни мустаҳкамлаш, шунингдек назорат тартибида текширув ўтказишга доир амалий кўникмаларни изчил шакллантиришдан иборат бўлди.

Ўқув машғулоти уч босқичда ташкил этилди. Биринчи босқичда текширув объектлари сифатида шартли равишда турли функционал йўналишларга эга тўртта локация белгиланиб, талабалар ўртасида тегишли текширув гуруҳлари шакллантирилди. Шунингдек, текширув йўналишлари аниқланиб, текширувга оид саволлар рўйхати ишлаб чиқилди.

Иккинчи босқичда талабалар белгиланган текширув объектларида бевосита иш олиб бориб, имитацион форматда прокурор текширувини амалга оширувчи мансабдор шахслар ролини ижро этдилар ҳамда назорат тадбирларини ўтказиш тартибини амалиётда қўллаб кўрдилар.

Якуний босқичда эса текширув гуруҳлари моделлаштириш жараёнида аниқланган ҳолатлар юзасидан тақдимотлар ўтказиб, текширув натижалари бўйича тайёрланган маълумотномалар ҳамда прокурор таъсир чораларига оид ҳужжатлар лойиҳаларини ўқув мақсадларида тақдим этдилар.

Имитацион форматда ташкил этилган мазкур ўқув машғулоти Академияда талабаларни комплекс тайёрлашга қаратилган тизимли ёндашувнинг муҳим таркибий қисми сифатида намоён бўлиб, аудитор машғулотлар, амалий йўналтирилган ўқув шакллари, дуал таълим доирасидаги тайёргарлик ҳамда тегишли органларда бевосита амалий фаолият жараёнида шакллантирилаётган касбий билим ва амалий кўникмаларни ўзаро уйғун ҳолда тўлдиришга хизмат қилади.