Ҳуқуқни муҳофаза қилиш академиясида шаклланган анъанага мувофиқ, ҳар йили умумий ўрта таълим муассасалари битирувчилари, уларнинг ота-оналари ҳамда жамоатчилик вакиллари учун “Очиқ эшиклар куни” тадбирлари ташкил этиб келинмоқда. Мазкур тадбирлар ёшларнинг ҳуқуқий соҳадаги таълим имкониятлари билан яқиндан танишиши, Академия фаолияти ҳақида холис ва батафсил маълумот олишига хизмат қилади.
Академияда Жиззах вилояти Юридик техникуми битирувчилари учун “Тергов фаолияти” бакалавриат таълим йўналишига ўқишга қабул қилиш тартибига бағишланган навбатдаги “Очиқ эшиклар куни” тадбири ўтказилди.
Тадбир давомида иштирокчиларга қабул жараёнининг босқичлари, танлов мезонлари, ўқув дастурининг мазмун-моҳияти ва таълим жараёнининг ўзига хос жиҳатлари ҳақида батафсил маълумот берилди. Шунингдек, талабалар учун яратилган замонавий шарт-шароитлар, амалий машғулотлар ўтказиладиган махсус ўқув лабораториялари намойиш этилди.
Хусусан, криминалистика, полиграфия, сўроқ қилиш, суд жараёни иммитацияси, суд-тиббиёт экспертизаси бўйича ўқув лабораторияларида намунавий амалий машғулотлар кўрсатилиб, келажак терговчиларнинг касбий кўникмаларни шакллантириш жараёни амалда қандай ташкил этилиши тушунтирилди. Бу эса битирувчиларда назарий билим билан амалиёт уйғунлигини таъминлашга қаратилган таълим модели ҳақида аниқ тасаввур ҳосил қилди.
Тадбир иштирокчилари Академияга ўқишга қабул қилиш тартиби, таълим жараёни, талабалар учун яратилган имкониятлар ҳамда келгусидаги хизмат фаолияти истиқболлари юзасидан ўзларини қизиқтирган саволларга атрофлича жавоб олдилар.
Маълумки, Ўзбекистон Республикаси Ҳуқуқни муҳофаза қилиш академияси жиноятларни тергов қилиш соҳасида кадрларни амалиёт билан узвий боғлиқ ҳолда, ягона ёндашув асосида тайёрлашга қаратилган узлуксиз ўқув тизимини йўлга қўйган. Академияда “Тергов фаолияти” бакалавриат таълим йўналишида талабалар дастлабки тергов ва суриштирув органларининг тергов тармоқларида самарали хизмат қилишга тайёрланмоқда.
“Очиқ эшиклар куни” тадбири очиқлик, шаффофлик ва юқори ташкилий савияда ўтказилиб, иштирокчиларда Академия фаолияти ва унинг таълим тизимига нисбатан ижобий фикр шакллантирди.