Ҳуқуқни муҳофаза қилиш академиясида Одам савдосига қарши курашиш ва муносиб меҳнат масалалари бўйича миллий комиссия ҳамда ЕХҲТнинг Ўзбекистондаги лойиҳалар координатори билан ҳамкорликда одам савдоси билан боғлиқ жиноятларни тергов қилишда рақамли технологиялардан фойдаланиш ва ОСИНТ (очиқ манбалар асосидаги разведка) негизида проактив онлайн тергов ўтказишга бағишланган халқаро семинар-тренинг бўлиб ўтди.
Икки кун давомида Швеция, Нидерландия ва Польша ҳуқуқни муҳофаза қилиш органлари вакиллари ҳамда Академиянинг Рақамли криминалистика илмий-тадқиқот институти мутахассислари раҳбарлигида иштирокчилар онлайн тергов ўтказиш ва ОСИНТ воситаларидан фойдаланиш бўйича илғор хорижий ва миллий тажрибани ўргандилар. Шунингдек, ижтимоий тармоқлар, мессенжерлар, онлайн ўйинлар, даркнет ва сунъий интеллектдан жиноий мақсадларда фойдаланиш билан боғлиқ хавфлар атрофлича муҳокама қилинди.
Семинар-тренингнинг амалий қисми иштирокчиларда хавфли платформаларни аниқлаш, ОСИНТ инструментларидан фойдаланиш, веб-инфратузилмани таҳлил қилиш ҳамда реал кейслар асосида маълумотларни тўплаш ва қайта ишлаш кўникмаларини шакллантиришга қаратилди.
Тренинг якунида таълим ва амалий фаолиятда ОСИНТ воситалари ва рақамли криминалистиканинг бошқа усулларини самарали қўллаш бўйича амалий тавсиялар берилди. Шунингдек, ҳуқуқни муҳофаза қилиш органлари учун малакали кадрлар тайёрлаш тизимига проактив онлайн тергов бўйича ўқув модулларини интеграция қилиш масалалари муҳокама қилинди.