Ўзбекистон Республикаси Ҳуқуқни муҳофаза қилиш академиясида таълим сифатини ошириш, хорижий тилларни ўқитиш самарадорлигини юксалтириш, инглиз тили таълимига илғор ва самарали ёндашувларни татбиқ этиш ҳамда CELTA тизими асосидаги замонавий ўқитиш усулларини ўқув жараёнига жорий этиш мақсадида хорижий тил методистикаси соҳасидаги мутахассисни Академия фаолиятига вақтинчалик асосда жалб этиш зарурати мавжуд.
Мутахассис томонидан тақдим этилган ҳужжатлар маъқулланган тақдирда, у билан Академия ўртасида икки томонлама фуқаролик-ҳуқуқий шартнома имзоланади.
Мутахассис қуйидаги вазифаларни амалга оширади:
Академияда хорижий тилларни ўқитиш жараёнини замонавий педагогик ёндашувлар асосида ташкил этилишини таъминлайди.
Дарс тузилиши, ўқитиш усуллари, ўқитувчи ва тингловчилар ўртасидаги ҳамкорлик ҳамда ўқувчилар фаоллигини таҳлил қилади.
Инглиз тили таълимига илғор хорижий тажриба ва CELTA тизими асосидаги самарали ўқитиш усулларини жорий этиш бўйича таклифлар ишлаб чиқади ва амалиётга татбиқ этади.
Дарс жараёнида талаба ва тингловчиларнинг даражаси, эҳтиёжи ва касбий йўналишидан келиб чиқиб, мос ўқитиш усул ва воситаларини ишлаб чиқади.
Инглиз тили бўйича машғулотлар самарадорлигини таҳлил қилади, баҳолайди ҳамда ўқув жараёнини такомиллаштириш юзасидан тавсиялар беради.
Кафедра ўқитувчилари учун инглиз тилини ўқитишда янги ёндашувлар, интерактив методлар ва замонавий дарс ташкил этиш шакллари бўйича методик кўмак кўрсатади.
Академия ходимлари учун ички тренинглар ва семинарлар ташкил этади.
Академия раҳбариятининг топшириқларини белгиланган муддатларда сифатли бажаради.
Номзод олий ёки тугалланмаган олий, шунингдек ўрта ёки ўрта-махсус маълумотга эга бўлиши лозим. Номзоднинг ёши 18 ёшдан кичик ва 50 ёшдан катта бўлмаслиги керак. У инглиз тилини ўқитиш соҳасида қўлланиладиган замонавий техник воситалар, ахборот-коммуникация технологиялари, рақамли таълим платформалари ва дастурий маҳсулотлар билан ишлаш кўникмаларига эга бўлиши талаб этилади.
Иш фаолияти прокуратура органлари тизимида олиб борилиши муносабати билан мутахассис сифатида жалб этилган шахс прокуратура органларида ўрнатилган ахлоқ талабларига қатъий амал қилиши шарт.
Мазкур иш муддати 2 ой этиб белгиланган. Бажарилган иш учун тўлов миқдори тарафлар келишуви асосида белгиланади ва мутахассисга у бажарган ишлар натижалари бўйича хизматларни топшириш-қабул қилиш далолатномаси имзоланганидан сўнг ҳар ойда тўлаб борилади.
Номзоддан масъулият ва профессионализм, ташаббускорлик, жамоа билан ҳамжиҳат ишлаш ҳамда берилган топшириқларни ўз вақтида ва сифатли бажариш талаб этилади.
Иш вақти ҳафтасига 5 кун, ҳар куни соат 09:00 дан 18:00 гача, 40 соатлик иш ҳафтаси ҳисобланади.
Мутахассис ўз фаолиятини бевосита Академияда амалга оширади. Алоҳида ҳолларда, тарафлар келишувига кўра, айрим ишлар масофадан туриб бажарилишига йўл қўйилиши мумкин.
Талабгор Академия Тил ўргатиш кафедрасига фуқаролик паспорти ёки ID-картаси билан шахсан мурожаат қилиб, шахсини тасдиқловчи ҳужжат, объективка, олий маълумот тўғрисидаги ҳужжат (диплом ва унинг иловаси), сертификатлар нусхалари, меҳнат дафтарчаси кўчирмаси, СТИР ҳамда ПИНФЛ маълумотномасини тақдим этиши лозим.
Тақдим этилган ҳужжатлар ўрганиб чиқилганидан сўнг, заруратга кўра номзод билан комиссия таркибида суҳбат ўтказилади.
Ҳужжатлар 2026 йил 4 апрель кунига қадар (шу куни ҳам) қабул қилинади.
Манзил: Тошкент шаҳри, Юнусобод тумани, Рихсили кўчаси, 9-уй (мўлжал: собиқ «Зенит» заводи).
Ҳужжатлар душанба-жума кунлари соат 10:00 дан 17:00 гача қабул қилинади.
Мурожаат учун телефон: 71-202-04-96 (1763).